Drejtori i shkollës “Babë Dudë Karbunara”, Yzedin Hajdaraj, vazhdon të mohojë akuzat për ngacmim seksual.
Pasi u njoh me masën e sigurisë pas denoncimit të dy nxënëseve, me inicialet L.F. dhe F.F., 16 vjeçe, ai është shprehur në seancën gjyqësore se akuzat ndaj tij janë shpifje, e përkundrazi ai e ka ndihmuar njërën prej tyre, e cila ka qenë e sëmurë.
“Janë shpifje. Jo vetëm që nuk kam abuzuar me askënd, por për njërën nga vajzat kam ndërmarrë një fushatë sensibilizimi për mbledhje fondesh në shkollë, pasi vuante nga një sëmundje gjaku.”, mësohet të ketë thënë ai.
Por pavarësisht pretendimeve të Hajdarajt, gjykatësja Rudina Palloi cilësoi si të ligjshëm arrestimin dhe vendosi ndaj 59-vjeçarit masën e sigurisë “arrest në burg”.
Njëra prej nxënëseve (për të cilën drejtori është shprehur se e ka ndihmuar), është shprehur se drejtori e kishte ngacmuar rreth një muaj më parë.
(XH.A/SHUPLAKA)
