Kryetarja e Lëvizjes Socialiste për Integrim, Monika Kryemadhi gjatë një takimi me strukturat e LRI-së në njësinë numër dy në Tiranë, ju ka thënë të pranishmëve që të shtrojnë terrenin për zgjedhjet e përgjithshme të parakohshme që do të mbahen në fund të majit.
Ajo deklaroi se LSI është një forcë politike e besueshme tek qytetarët, dhe për këtë anëtarët e kësaj force duhet të shfrytëzojnë terrenin që sipas saj, tashmë është i tyre duke ripërsëritur se nuk kanë pse habiten që do të ketë zgjedhje parlamentare në fund të majit.
“Mos u demoralizoni nga reagimet dhe deklaratat e ndërkombëtarëve, por mos hezitoni, ne jemi një forcë e besuar tek qytetarët, terreni është i juaji, hapësirat janë të tuajat, mos ndaloni, mos u ndikoni nga çdo lloj intimidimi që mund t’ju bëhet. Shkoni në terren, flisni me njerëzit dhe shtroni terrenin për zgjedhjet e përgjithshme që do të zhvillohen në fund të majit. Mos u habisni, në fund të majit do të ketë zgjedhje të parakohshme”, deklaroi Kryemadhi ndër të tjera.
Ajo tha gjithashtu se opozita ka bërë sondazhe të cilat sipas saj kanë treguar se 94% e shqiptarëve esojnë që jeta e tyre është më e shtrenjtë se ç’ka qenë, çka do të thotë se dhe socialistët edhe ata që nuk votojnë kurrë, mendojnë si ne.
“Të jeni të bindur që 94% e shqiptarëve meqë flitet për sondazhet dhe po jua them unë që bëjmë dhe ne sondazhe dhe i bëjmë sondazhet shumë të mira, mendojnë që Shqipëria është më e varfër se ç’ka qenë. 94% e shqiptarëve besojnë që jeta e tyre është më e shtrenjtë se ç’ka qenë, çka do të thotë se dhe socialistët edhe ata që nuk votojnë kurrë, mendojnë si ne. Prandaj detyra juaj është që t’i zgjojmë, t’i sensibilizojmë, t’u flasim për LSI. Që jemi një forcë politike dhe parti politike e të rinjve dhe të rejave. Njerëzit e kanë perceptimin shumë të mirë për LSI-në. Njerëzit e kanë perceptimin shumë të mirë për ta ndryshuar këtë realitet”, deklaroi më tej Kryemadhi.
(F.GJ/FAXWEB.AL)
Discussion about this post