Në kafe me të vetët, Rama komenton marrjen e Bashës si të pandehur: Pastrimi i pastër parash, e detyruan…

Kryeministri Edi Rama ka komentuar sot vendimin e prokurorisë për të thërritur të hënën për të pyetur kryedemokratin Lulzim Basha dhe dy funksionarë të kësaj partie, lidhur me kontratat e dyshimta të lobimit në SHBA.

Në një kafe me deputetët e tij dhe një numër të vogël të qytetarëve në njësinë 11, Rama tha se ajo që ka bërë Basha është një pastrim parash, duke marrë në këtë mënyrë dhe atributet e gjykatësit.

Fillimisht Rama u shfaq sikur nuk kishte dijeni për thirrjen e Bashës si i pandehur, por pranë kishte Ulsi Manjën që ia sqaroi të gjitha.

Pjesë nga dialogu i Ramës me deputetët e tij dhe me Veliajn:

Rama: Është marrë i pandehur? Ai është pastrim parash i pastër, minimumi. Imagjono ta kishim bërë ne, se çfarë kush e di se ku do ishim.

Veliaj: Do ishim ekzekutuar…

Rama: Më kishte shkruar njëri në Facebook “Luli ekperiment i Rusisë, për të parë deri në çfarë pike mund të duroj mileti pa u çmend’’.

Manja: Është e qëllimshme, nuk i kanë raportuar

Rama: Nuk është punë raportimi, por duhet të tregojnë nga i kanë nxjerrë.

Manja: S’ka burimin e parave

Rama: Gaboi keq shumë, që pas marrëveshjes se e komleksuan ata. E vetmja gjë prej lideri që ka bërë, ka qenë marrëveshja.

Prokuroria do të marrë si të pandehur kreun e PD-së Lulzim Basha për çështjen e kontratatve të lobimit në SHBA në perjudhën zgjedhore të 2017. Kryedemokratit i është dërguar një fletë-thirrje për t’u paraqitur ditën e hënë, më 17 qershor në orën 09:30, në prokurorinë e Tiranës ku do i komunikohet edhe zyrtarisht akuza që është ngritur kundër tyre.

Në shkresën e firmosur nga prokurorët e çështjes Ervin Karanxha, Gjergji Tako dhe Kole Hysenaj, theksohet se nëse Basha së bashku me Ristanin dhe Dervishin nuk paraqiten do të shoqërohet me forcë.

Prokuroria bën me dije se Basha do të pyetet në lidhje me këtë çështje në cilësinë e të pandehurit, ndërsa janë të proceduar  edhe ish-sekretari i Përgjithshëm i Partisë Demokratike Arben Ristani dhe Ilir Dervishi, të cilët sipas prokurorisë akuzohen për falsifikim dhe fshehje të financimeve.

Lulzim Basha akuzohet se ka fshehur financimin prej 650 mijë dollarësh në SHBA për fushatën e elektorale të vitit 2017. Pak muaj më parë, prokuroria deklaronte se njëra nga këto pagesa rezulton të jetë bërë nga “Biniatta Trade”, një kompani e cila rezulton e regjistruar në Edinburg të Skocisë dhe është në pronësi të një zinxhiri kompanish të regjistruara në Belize, një shtet i Amerikës Qendrore i njohur si “parajsë fiskale”.

(E.K/Faxweb.al)