Ambasadori i Shteteve të Bashkuara të Amerikës, Donald Lu, ka zhvilluar një takim prej 45 minutash me kryeministrin Edi Rama. Takimi kokë më kokë mes tyre u zhvillua në ambientet e Kryeministrisë.
Ai vjen pak minuta pas takimit që kryedemokrati Basha zhvilloi këtë paradite me aleatët parlamentarë në selinë e Partisë Demokratike.
Gjatë ditës së sotme pritet që kryetari i PD-së të japë përgjigjen e tij zyrtare mbi paketën e propozimeve të zyrtarit të lartë amerikan Hoyt Brian Yee, një paketë e sjellë më parë nga McAllister gjatë vizitës së tij në Shqipëri.
Në takimin me gazetarët, Yee u shpreh një ditë më parë se kryeministri Rama i pranonte propozimet e ndërkombëtarëve. “Ne besojmë se ai do që ta shohë Shqipërinë të ecë drejt Bashkimit Europian, do që ajo të jetë një shembull për pjesën tjetër të rajonit, një forcë e stabilitetit dhe zhvillimit për vendet e tjera të rajonit. Si rrjedhojë, ne nuk besojmë se është në interesin apo në planin e tij që të qeverisë pa opozitën apo, e thënë ndryshe, të jetë pa asnjë lloj opozite konstruktive.”, u shpreh dje ndër të tjera Yee për Ramën.
(XH.A/SHUPLAKA)
