Nëna e ish-të dashurit të 23- vjeçares Desara Mançellari ka pohuar se ajo ishte kundër kësaj lidhjeje. Në deklarimin e dhënë gjatë hetimit, shtetasja A.P. ka rrëfyer se kishte ndërruar mendim për Desarën, pasi nuk i kishte pëlqyer sjellja e saj.
Pas rreth 1 muaji i them Filipit ta ftojë Desarën për drekë në shtëpinë tonë. Kur erdhi te ne, Desara ishte e veshur me një veshje ekstravagante dhe me një sjellje të paedukuar dhe jo brenda normave dhe etikës. Kjo gjë mua më bëri shumë përshtypje, pasi herën e parë që e kisha takuar ishte komplet ndryshe.
Atë ditë unë i them Filipit se Desara nuk më pëlqen me sjelljet dhe komunikimin që bën. Ai më tha se ato ishin çështje të tyre dhe jo të miat. Unë gjatë kësaj periudhe isha e shqetësuar që djali rrinte me Desarën, pasi nuk më pëlqente sjellja e Filipit që rrinte gjithë kohën me të dhe nuk kujdesej për familjen. Për këtë arsye, unë vendosa të komunikoja me Desarën, duke i kërkuar që të lejonte Filipin për të pasur pak kohë që të merrej me familjen. Por nga ajo mora një përgjigje shumë të keqe, si dhe Filipit i tha gjëra të tjera, jo ato që i kisha thënë unë”, ishte dëshmia e saj në gjykatë.
Sipas A.P., gjatë raportit me 23-vjeçaren djali i saj ishte shkëputur nga familja, si dhe kishte marrë lekë borxh te të njohurit e tyre për t’i shpenzuar me të dashurën.
“Me sa di unë, lidhja e tyre është ndërprerë herën e fundit që ne jemi kthyer nga Greqia në mars 2016. Për sa i përket natës që kanë qenë në lokalin tonë, dua të them se unë detajet e asaj dite i kam marrë vesh, mbasi ka ndodhur kjo ngjarje, por një ditë pasi kishin qenë te lokali jonë. Bashkëshorti im më tha se Filipi ishte ndarë përfundimisht nga Desara, duke më shpjeguar pak se si ishin ndarë. Pas kësaj ndodhi dhe ngjarja ku Desara i vendosi zjarrin makinës sime. Unë u shokova nga kjo ngjarje, pasi nuk e mendoja kurrë një gjë të tillë”, ka shtuar nëna e Filipit në dëshminë e saj.
Ngjarja në fjalë ka ndodhur në prill të këtij viti, kur vajza në shenjë hakmarrje ndaj të dashurit dogji makinën e tij me benzinë dhe bashkë me të edhe 3 makina të parkuara aty pranë. (A.R/SHUPLAKA)
Discussion about this post