Ministri për Evropën dhe Punët e Jashtme, Igli Hasani, në një bashkëbisedim me gazetarët tha sot se janë 195 profesionistë që kanë aplikuar për të qenë pjesë e Misionit të Shqipërisë në Bashkimin Evropianë.
Hasani saktësoi se thirrja nuk është vetëm për diplomatë, por edhe për profesionistë të tjerë që duan të japin kontributin e tyre në Misionit të Shqipërisë në Bruksel.
“Nuk është thirrje vetëm për diplomatët, por thirrje për të gjithë shqiptarët, ekspertë në fusha të ndryshme, që e ndjejnë të nevojshme për të kontribuar për vendin tonë. Numri aplikantëve është 195 shqiptarë dhe shqiptare kudo ku janë, ku përjashtoi punonjësit e MEPJ, dhe që kanë shprehur dëshirën për t’u bërë pjesë e skuadrës për integrimin në BE”, tha Hasni.
Ai bëri të ditur se, “po bëhet vlerësimi nga skuadra e burimeve njerëzore, do merren dhe në intervista me këta të interesuar. Do jetë e angazhuar ministrja, ambasadori jonë në Bruksel. Gjithnjë e më shumë ata njerëz që në momente t caktuara e kishin vendosur ta shikonin të ardhmen e tyre jashtë vendit, gjithnjë e më shumë po e shohin dëshirën për t’u kthyer, dhe rikthimin e tyre në Shqipëri, sjellin dhe eksperiencën e tyre”, tha Hasani.
Aplikimet kanë nisur më 1 dhjetor. Skuadra e Shqipërisë në Bruksel do të rritet në numër dhe ekspertizë.
