Kryeministri Edi Rama reagon për herë të parë pas përfundimit të bisedimeve me eurodeputetin Knut Fleckenstein dhe kreun e Kuvendit Ilir Meta, për zgjidhjen e ngërçit politik.
“Miq! Gjithnjë të hapur për dialog pa kushte. Por pa Vetingun s’ka asnjë kompromis, sepse Drejtësia për Shqipërinë që duam nuk negociohet”, shkruan Rama duke lënë të nëkuptohet se deri më tani negociatat nuk kanë patur sukses.
Rreth orës 19:00 të mbrëmjes së sotme, dy zyrtarët e BE-së Knut Fleckenstein dhe David Mcallister janë takuar veç e veç me Ramën dhe Bashën. Knut Fleckentein ishte me kryeministrin Rama dhe kreun e Kuvendit Metën, ndërsa David McAllister me kreun e opozitës, Basha.
“Shuplaka” mëson nga burime brenda Partisë Demokratike, se asgjë nuk është arritur deri më tani. Sipas PD-së, kjo sepse kryeministri Rama nuk pranon kërkesën e tyre parësore që është krijimi i qeverisë teknike. Rama ka rënë dakord vetëm për shtyrjen e zgjedhjeve deri më 16 korrik, por jo për qeverinë teknike. Për këtë arsye, dy palët nuk kanë rënë dakord me njëra-tjetrën.
Sipas demokratëve, negociata del me sukses vetëm nëse arrihet qeveria teknike. Ndërsa ndryshimet në KQZ, policia dhe siguria për të mos patur shitblerje, është vetëm një opsion i kryeministrit Rama, për të zëvendësuar kushtin e demokratëve, për krijimin e një qeverie teknike. (D.D/Shuplaka)
Discussion about this post