Zhvillimet e ngjeshura që karakterizuan dje situatën politike në vend, nuk patën asnjë rezultat. E pas dështimit të negociatave, pasi ato nuk shërbyen për gjë, kryeministri Rama zgjedh “heronjtë që shërbejnë çdo ditë” për t’u uruar “Mirëmëngjes” shqiptarëve.
Ai vë në dukje punën e tyre, impenjimin në kushte të vështira në të cilat punojnë të gjithë të punësuarit në sistemin e energjisë, për ata që e kthyen reformën në energji në histori suksesi.
“MIRËMËNGJES
dhe ju uroj një ditë të mbarë me këtë imazh të përkushtimit në detyrë të këtyre heronjve të heshtur që shërbejnë çdo ditë, në çdo orë dhe shumë më fort në kushte tejet të vështira, për të siguruar furnizimin me energji për qytetarët kudo ndodhen.
Mirënjohje dhe respekt për të gjithë ata punonjës në sistemin e energjisë që me aftësitë dhe ndershmërinë e tyre e kthyen reformën në energji në një histori suksesi, falë së cilës sot shqiptarët paguajnë më pak për faturat e tyre ndërsa sektori nga një barrë për taksapaguesit, tanimë kontribuon me të ardhura në buxhetin e përbashkët të shqiptarëve.
Shumë është bërë por edhe më shumë mbetet ende për tu bërë në rrugën e kthimit të energjisë në një burim mirëqenie për Shqiptarët. Por edhe shumë ka për të humbur nëse ndalemi sot. Prandaj përpara për #ShqipërinëQëDuam me#Shtet #Punë #Mirëqenie.”, shkruan kryeministri.
(XH.A/SHUPLAKA)
