Pas votimit të Parlamentit holandez për rikthimin e vizave për shqiptarët me pretendimin se kishte një rritje të madhe të numrit të shqiptarëve të përfshira në veprimtari kriminale, Kryetari i Kuvendit Gramoz Ruçi i shoqëruar nga kreu i grupit parlamentar i Partisë Socialiste Taulant Balla dhe deputetja demokrate Rudina Hajdari ndodhen në Hagë. Në vizitën 3- ditore zyrtarët shqiptar pritet të zhvillojnë takime të rëndësishme me zyrtarë të lartë të parlamentit vendas.
Vizita zhvillohet pak ditë para publikimit të raportit të progresit të Komisionit Europian ku pritet rekomandimi pa kushte për çeljen e negociatave me Shqipërinë, nisur edhe nga fakti se zyrtarë të lartë të KE e kanë bërë të qartë se Tirana zyrtare i ka bërë detyrat e shtëpisë.
Sipas burimeve, Ruçi dhe Balla gjatë takimeve do të diskutojnë mbi reformat e kryera nga qeveria shqiptare dhe të miratuara nga Kuvendi i Shqipërisë me qëllim që të bindin parlamentarët hollandezë se Shqipëria meriton mbështetjen për çeljen e negociatave dhe anëtarësim.
Ndërsa po ashtu bëhet me dije se gjatë takimit zyrtarët shqiptar do të flasin edhe për masat e marra nga shteti shqiptar kundër fenomenit të azilkërkimit.
Kujtojmë se më 16 prill Parlamenti holandez votoi për pezullimin e rikthimin e liberalizimit të vizave për shqiptarët me pretendimin se numri i shqiptarëve të përfshira në veprimtari kriminale ishte rritur.
Teksa ky votim nuk ka vënë ende në lëvizje asnjë mekanizëm të Bashkimit Evropian që mund të rrezikojë udhëtimin pa viza, pavarësisht përpjekjeve të Shqipërisë për të treguar se është gati për çeljen e negociatave, sikurse u paralajmërua Holanda nuk do ta thotë fjalën e saj të fundit përpara se të dalë Raporti i Komisionit Evropian në 29 maj. Ndërsa vota e 19 qershorit në Këshillin e Ministrave të BE-së për hapjen e negociatave për vendin tone.
Përsa i përket axhendës, në lidhje me intinerarin që do të ndjek Kreu i Kuvendit gjatë vizitës së tij 3 ditore në Holandë, bëhet me dije se ato do të fillojnë me një takim informativ me ish-ambasadorin holandez të OSBE në Tiranë, Robert Bosch, i cili është një zë kundër vendimit të Parlamentit të tij, për pezullimin e regjimit të lëvizjes pa viza për shqiptarët, me argumentin se jo të gjithë shqiptarët janë kriminelë dhe se ata nuk mund të futen të gjithë në një thes.
Mëngjesin e së martës, Ruçi dhe Balla do takohet me Kryetaren e Dhomës së Dytë të Parlamentit holandez, znj. Kadija Arib. Ndërkohë që pasditen e së martës, Ruçi dhe delegacioni që e shoqëron, do të zhvillojë një seancë dëgjimore me Komisionin e Çështjeve evropiane, komision i cili do të përcaktojë vendimin e Holandës ndaj Shqipërisë.
Të mërkurën, ditën e fundit të vizitës, kryetari i Kuvendit do takohet me Kryetaren e Senatit Holandës, znj.Ankie Brokers – Knol dhe me Senatorë holandezë.
Discussion about this post