Aktivisti Besjan Pesha është padyshim një nga njerëzit që është investuar më së shumti sa i përket çështjeve të shoqërisë civile.
Nuk lë rast pa e shprehur protestën e tij, edhe pse hera-herës mbështetja nga ana e qytetarëve të tjerë nuk është ajo që do duhej.
Së fundi ai ka reaguar në lidhje me protestat që po mbahen në Rumani kundër Reformës në Drejtësi, dhe heq paralelizmin mbi realitetin shqiptar. Peshaj thotë se opozita mban pjesën e luanit dhe nuk ka frikë të thërrasë protesta e mbi të gjitha nuk i përdor ato për pazare ordinere personale por për të mbledhur kapital politik duke frenuar të keqen (sipas saj) i cili do ta sjellë gradualisht në pushtet.
“Në Rumani po mbushen sheshet çdo javë nga njerëz të shqetësuar për Reformën në Drejtësi e cila synon të forcojë ndikimin e ekzekutivit në gjyqësor.
Të rinj, të vjetër, burra e gra kanë zënë sheshet megjithëse aty bën më ftohtë dhe e festojnë Krishtlindjen më shumë se ne. Njerëz të thjeshtë, me ndërgjegje të lartë qytetare dhe me dashuri për veten e për vendin. Sigurisht që pjesën e luanit e organizon opozita e cila bën, me devotshmëri, detyrën për të cilën votohet dhe paguhet.
Nuk ka frikë të thërrasë protesta e mbi të gjitha nuk i përdor ato për pazare ordinere personale por për të mbledhur kapital politik duke frenuar të keqen (sipas saj) i cili do ta sjellë gradualisht në pushtet. Nejse, po shkoj të ha ndonjë qofte nga sheshi…”, shkruan mes të tjerave aktivisti Peshaj.
(E.K/FAXWEB)
