Mimoza Gremi, nëna e Marsela Toshit ka rrëfyer momentin kur ka marrë vesh ngjarjen e rëndë që i ka shkaktuar tronditje të madhe.
“Unë e mora vesh lajmin me anë të kunatit tim, isha duke punuar, duke pastruar dhe më ra telefoni. Në fillim ai më pyeti “A more vesh gjë andej nga Shqipëria? More vesh gjë nga Naumi. Naumi ka vrarë veten.” Bërtita: O i shkreti, o i shkreti. Por ai më tha më pas se ka vrarë edhe dy fëmijët. Nuk pyeta më, nuk dija ça të bëja më. U trondita”,
Më tej, pas lidhjes telefonike të së bijës në emisionin “Me zemër të hapur”, nëna e 24-vjeçares ka hedhur poshtë deklaratat e Marsela Toshit. Akuzat e saj ndaj të ëmës, babait dhe bashkëshortit, Mimoza Gremi i ka cilësuar “mashtrime”.
“Sime bije nuk i mungonte asgjë. Kur ke të hash, të pish, kur një burrë të thotë “Mos puno”, çfarë do më? Ajo ka një llogari bankare, vetë ma ka thënë, tani tallet me ne. Kur më ka kërkuar para, i kam depozituar 300 euro për t’i blerë syzet djalit të madh. E mora në telefon, ajo nuk ma hapte, i thoshte Naumit “Ajo s’është nëna ime”. Akuzat ndaj Naumit nuk janë të vërteta, ai lloj njeriu nuk i rrihte fëmijët.”, është shprehur nëna e 24-vjeçares.
Por Marsela Toshi, nëna e dy fëmijëve që dyshohet se u mbytën nga babai i tyre, mohon të ketë pasur para, duke theksuar se jetonin në gjendje të vështirë ekonomike: “Llogarinë bankare e hapa gjatë kohës që punoja tek fabrika e duhanit. Por, 4 milionë lekët nuk janë të miat, i kishte Naumi.”
