I ftuar në emisionin “Top Story” të gazetarit Sokol Balla, nënkryetari i grupit parlamentar të LSI-së Luan Rama, sulmon Policinë e Shtetit, duke u shprehur se nuk e ka kryer punën sic duhet, madje një pjesë e efektivëve të saj janë të përfshirë në tregtimin e lëndëve narkotike.
“Fakti që në 2016-ën Shqipëria ka shënuar një nivel të lartë të mbjelljes së kanabisit, është dështim i qeverisë, se nuk është detyrë vetëm e policisë, sepse duke e cilësuar kështu tregojmë mungesë njohurie. Është detyrë e shoqërisë dhe e qeverisë dhe duhet ta kontrollojë dhe parandalojë.
Mori këto përmasa për shkak të mos kryerjes siç duhet të detyrës së policisë, e cila paraprakisht duhet ta parandalojë mbjelljen e kanabisit, dhe në fund ta korrë. Dhe jo e kundërta.
Nuk mund të kishte këto përmasa pa praninë e një mbështetje me prapavijë politike dhe të një pjese të oficerëve të policisë. Nuk është mbjellë një vazo kanabis, as 10, por 10 mijë rrënjë në një fushë. Po në të gjitha fushat e Shqipërisë?!”, shprehet Luan Rama.
Megjithatë, pavarësisht këtyre deklaratave të forta, nënkryetari i LSI-së u shpreh se ky nuk ishte një sulm, as ndaj Tahirit, as ndaj policisë.
“Nuk ka asnjë sulm kundër Saimir Tahirit. Nuk ka asnjë sulm ndaj Ministrisë së Brendshme dhe ndaj Policisë së Shtetit. Ka raste, kur deputetë dhe funksionarë, ministër si Lefter Koka kanë denoncuar në publik një sjellje të caktuar nga segmente të caktuar të Policisë së Shtetit dhe njësitë e qeverisjes vendore”, u shpreh ai. (D.D/Shuplaka)
Discussion about this post