Nënkryetari i PDK-së: Numrat i kemi, të enjten Veseli zgjidhet Kryetar i Kuvendit

Nënkryetari i PDK-së, Rexhep Hoti, ka deklaruar se PAN i ka votat për të zgjedhur Kadri Veselin Kryetar të Parlamentit.Hoti ka thënë se kryetari i PDK-së, Kadri Veseli, ka bërë një ofertë për votimin e institucioneve duke u tërhequr nga kandidatura për kryeparlamentar, me kusht që LAA dhe VV ta votojnë kandidatin tjetër të PAN-it dhe Haradinajn për Kryeministër, raporton RTV21.

“Deri të enjten kanë kohë të përgjigjen në ofertën e Veselit”, tha Hoti. Mirëpo koalicioni LAA dhe Vetëvendosje thonë se nuk do ta votojnë Kadri Veselin për kryetar të Kuvendit dhe as formimin e qeverisë ku bën pjesë edhe PDK-ja.

Shefi i Grupit Parlamentar LAA, Avdullah Hoti, thotë se ky koalicion nuk e voton Veslin për kryeparlamentar.

“Qëndrimi i koalicionit LAA është i qartë. Nuk e votojmë Kadri Veselin për kryetar të Kuvendit”, tha Hoti.

Por nënkryetari i PDK-së , Hoti, është i bindur se të enjten Kadri Veseli do të zgjidhet kryetar i Kuvendit, kurse Ramush Haradinaj kryeministër.

“Janë numrat dhe Veseli të enjten zgjidhet kryetar i Kuvendit”, tha ai.

(B.H/Shuplaka)