Gjatë takimit të sotëm në qytetin e Durrës, kryeministri Edi Rama ka paralajmëruar se do të bëjë ndryshime drastike në administratë.
“Ka zyra dhe agjenci të tepërta që janë kosto e që mbahen me rrogë parazite. Do të bëjmë një shkurtim drastik për të lehtësuar burokracitë në zyrat e shtetit”, tha Rama.
Ai është shprehur se përveç shkurtimeve në zyra dhe agjenci të tepërta, siç i quan ai, do të largojë shumë njerëz nga puna edhe në zyra të tjera të cilat do vazhdojnë të funksionojnë rregullisht.
“Ne po punojmë për qeverinë e re, që të mos jepen rroga parazite. Kushdo që do jetë në punë duhet të përmbushë përgjegjësitë e tij. Une jam këtu që të bëjmë ndryshimin, mos paguhen punonjësit e administratës siç ndodhte deri dje, jo për nevojat e qytetarit, por për ata që i kishin vendosur në punë, sipas ndarjes së tepsisë.
Nëse do e doja siç ishte, do isha në zyrë duke dëgjuar kërkesat e secilit sipas tepsisë. Por qveria e re duhet të jetë më e vogël, më efikase dhe duhet të ketë kapacitetin që të garantojë bashkëqeverisjen me njerëzit. Nuk duhet të ekzistojnë më ministri dhe agjenci që nuk u kthejnë përgjigje letrave dhe ankesave që bëjnë njerëzit. Nëse dikush bën një kërkesë, dhe s’merr përgjigje, do shihet ku ka ngecur puna. Nëse dikush nuk e ka bërë punën, do të largohet”, është shprehur Rama.
Kjo deklaratë vjen një ditë pasi Rama publikoi listën me 101 emrat e zyrtarëve, të cilët sipas komentuesve të tij në Facebook, kishin lidhje me korrupsionin dhe abuzimet që bëhen në administratë. Mos ndoshta të parët që do shkurtohen do jenë pikërisht këta zyrtarë? Kjo mbetet për t’u parë në lëvizjet e ardhshme të kryeministrit. (D.D/Shuplaka)
Discussion about this post