Coronavirusi ka vënë në alarm pjesën më të madhe të Italisë dhe futbolli ka kaluar në plan të dytë në këto momente. Javën që lamë pas, 6 ndeshje të kampionatit u shtynë dhe Serie A duket në kaos të plotë.
Zgjidhja e 13 majit duket se ka rënë poshtë dhe sipas raportimeve të fundit, zgjidhja e vetme mbetet që ndeshjet e prapambetura të luhen në datat 7, 8 dhe 9 mars. Nesër në mëngjes do të vijë edhe vendimi zyrtar.
Sfida kryesore, ajo midis Juventusit dhe Interit pritet të luhet të hënën, më 9 mars, njësoj si Milan-Genoa. Katër ndeshjet e tjera do të luhen me 7 dhe 8 marsit.
Kështu, java e 27-të që ishte programuar për këtë fundjavë do të shtyhet për javën e ardhshme. Thënë ndryshe, kalendari i Serie A do të pësojë postim me nga një javë, me ndryshimin e vetëm që një nga javët e fundit do të luhet me 13 maj, data e vetme bosh në kalendar, pasi me 24 maj kampionati duhet me patjetër të jetë i përfunduar, për shkak të EURO 2020. Kështu, Juventus-Inter dhe Milan-Genoa pritet që të luhen të hënën e 9 marsit.
