Ditën e nesërme seanca parlamentare është parashikuar që të mbahet në orën 10:00 të paradites, pavarësisht se opozita ka paralajmëruar protestë.
Në kushtet e organizimit të protestës në një kohë të shkurtër sekretariati organizativ i PD ka njoftuar me sms drejtuesit e degëve: Në orën 9:30 protestuesit të mblidhen para Kuvendit!
Kështu duket se dhe gjatë ditës së nesërme, opozita kërkon që të ketë një protestë masive, si dhe të pengojë seancën plenare ku do të betohen dhe katër deputetë të rinj, që i përkisnin listave të LSI-së, në fushatën e 2017-tës.
Nga ana tjetër deputetët e mazhorancës janë këshilluar që të jenë gjysmë ore më parë në sallën e Kuvendit, për të shmangur çdo përplasje të mundshme me turmën e protestuesve.
Ministri Lleshaj ka garantuar deputetët për sigurinë e tyre fizike, ndërsa kryeministri Rama ka kërkuar shmangien e çdo incidenti që është parë në protestat e fundit. Deri para dy orësh mazhoranca e kishte mbajtur të fshehtë orarin e seancës plenare, duke shkelur kështu dhe rregulloren e Kuvendit.
Ish-deputeti Edi Paloka ka paralajmëruar që protesta e nesërme do të jetë edhe më e gjallë për shkak se ‘’gazi i hedhur në drejtim të tyre, i ka prekur nervat qytetarëve”.
(E.K/FAXWEB.AL)
