E ndërsa mëngjesin e së premtes pritet të zhvillohet seanca për caktimin e masës së sigurisë ndaj të riut Gerti Shehu, që goditi me grusht, ish kryeministrin Berisha, prokuroria vijon mbledhjen informacioneve për 31-vjeçarin.
Burime bëjnë me dije se prokuroria ka dorëzuar në laboratorin e policisë shkenore monstra për të parë nëse Shehu, ditën që shkaktoi incidentin e rëndë ka qenë apo jo nën efektin e lëndëve narkotike.
Gjithashtu, Prokuroria e Tiranës ka sekuestruar kartelat mjekësore të 31-vjeçarit. Hetuesit pritet të verifikojnë edhe qëndrimin e familjarëve të Shehut që pretendojnë se ai kurohej prej 5 vitesh për çregullime psikotike që është konfirmur edhe nga mjeku psikiatër Sadik Lala . Mësohet se gjatë marrjes në pyetje në ambientet e spitalit të traumës, Shehu nuk ka shfaqur pendesë për goditjen ndaj Berishës.
Dosja e 31-vjeçarit ka mbërritur në Gjykatën e Tiranës ku të premten, pritet që të zhvillohet seanca për masën e sigurisë ndaj tij.
Aktualisht ai ndodhet në Spitalin e Traumës në Tiranë, ku po mjekohet pas goditjeve që mori nga mbështetësit e Berishës, pasi ai kreun sulmin fizik ndaj ish-kryeministrit. Nëse mjekët nuk japin leje të largohet nga spitali, atëherë masa e sigurisë do t’i komunikohet në ambientet e spitalit. Gerti Shehu akuzohet për goditje për shkak të detyrës dhe plagosje me dashje.
Discussion about this post