Ky 7-Mars shkollat e thella malore në Kukës i ka gjetur me më pak nxënës, për shkak të emigrimit masiv të familjeve kuksiane. Ekipi i Fax-News udhëtoi në shkollën fillore të fshatit Petkaj të njësisë administrative Malzi. Sot, 10 nxënësit e kësaj shkolle me lule në duar, pas rëniës së ziles së shkollës nga mësuesja e tyre sollën atmosferën e festës në këtë godinë e cila dita ditës po kthehet e shkretuar.
Nxënësit të grupuar në një klasë kolektive, të cilët udhëtojnë çdo ditë me kilometra të tërë, kishin përgatitur edhe urimet për mësuesen e tyre duke përcjell mesazhe mjaftë domethënëse në Ditën e Mësuesit.
Ka vështirësitë e veta të punosh në zona rurale, rruga është shumë e gjatë dhe e parregulluar. Janë të interesuar për shkollën dhe prandaj ia dalin.
Mësuesja e vetme e shkollës Fëllanxa Isufaj tregon vështirësitë me të cilat ajo haset çdo ditë në këtë zonë, mungesa e infrastrukturës ikja e nxënësve, klasat kolektive, varfëria e më e rrëzikshmja udhëtimi i fëmijëve me një largësi deri në tre kilometra për të ardhur në shkollë duke kaluar edhe përronj e lumenj si dhe ura kambësorësh janë disa nga sfidat që nxënësit, prindërit e mësuesja ndeshet çdo ditë.
Qarku i Kukësit prej vitesh po ndeshet me fenomenin e largimit të popullsisë në emigrim duke shkaktuar kështu edhe rënie të numrit të nxënësve në shkolla, ku mbi 80% e tyre në zonat rurale kanë klasa kolektive.
I pyetur nga gazetari Bekim Lekica, mësuesja Isufaj shprehet: “Unë kam shumë vite që punoj këtu, kam patur shumë nxënës, po emigracioni ka bërë që shumë të tjerë të ikin jashtë, e vështira është të punosh me klasa kolektive, po ia kemi dalë pasi dhe prindërit na kanë ndihmuar, me dëshirën që kam të punoj si mësuese, dashuria që kam për nxënësit më ka bërë t’ia dal me sukses. Unë mbaj tre klasa. Më parë ka patur mbi 30 nxënës, tani janë më pak se 10.”
Discussion about this post