Bizneset që furnizohen nga rrjeti 35 kilovolt i energjisë pritet të përballen me çmime më të larta të energjisë me të paktën 10 % pas liberalizimit në fillim të vitit 2018, nëse ato do të vijojnë të përdorin rrjetin e OSHEE-së.
Operatori i Shpërndarjes së energjisë në një shkresë të posaçme ka njoftuar bizneset që furnizohen nga rrjeti 35 kilovolt se ka marrë të gjitha masat përgatitore për kalimin e këtyre konsumatorëve në tregun e parregulluar të energjisë.
“Në mbështetje të nenit nr.86 dhe nr.109 të ligjit nr.43 2015 ju njoftojmë se: duke filluar që nga data 1 janar 2018 OSHEE nuk do të jetë furnizuesi juaj i energjisë elektrike. Pas kësaj date ju duhet të gjeni furnizuesin në tregun e liberalizuar. Ju keni të drejtën e furnizimit nga Furnizuesit i Mundësisë së Fundit (OSHEE) për një periudhë 2 mujore nëse mbeteni pa furnizues Në rastet kur:
-Furnizuesi i mëparshëm është në kushtet e paaftësisë paguese ose është në proces falimentimi;
-Furnizuesi i mëparshëm i është hequr ose i është pezulluar përkohësisht licenca
-Klienti nuk ka arritur të gjejë furnizues në treg
-Furnizuesi nuk është i aftë për të furnizuar me energji elektrike klientin fundor
“OSHEE i njofton kompanitë që furnizuesi i mundësisë së Fundit (OSHEE) do të aplikojë tarifat e miratuara nga Enti Rregullator sipas vendimit nr. 201 të këtij viti për miratimin e metodologjisë së përcaktimit të çmimit të shitjes së energjisë elektrike”, thuhet në shkresën e OSHEE-se drejtuar 75 bizneseve.
Metodologjia e ERE referon se “në përcaktimin çmimit të furnizuesit të mundësisë së fundit do të përfshihen kostot në lidhje me blerjen e energjisë elektrike, kostot e përdorimit të rrjetit të shpërndarjes /transmetimit dhe kostot e shërbimit të furnizimit te mundësisë së fundit të cilat nuk duhet të jenë më shume se, 10% të totalit të kostove të blerjes se energjisë elektrike për këtë qëllim”.
Burimet nga OSHEE pohojnë për Monitor se, sipas kësaj metodologjie çmimi i ri i energjisë për këtë biznese nëse do të miratohej në dhjetor do të ishte 14 lekë për kilovat orë. Por ky çmim mund të jetë më i lartë ose me i ulët në varësi të çmimeve të tregut të energjisë në Rajon ne vijimësi. Në çdo rast kur bizneset nuk dalin në tregun e lirë do të vijojnë të blejnë energji 10 për qind më shtrenjtë se çmimet e tregut nga OSHEE.
Politika e liberalizimit për konsumatorët e mëdhenj të energjisë është bëre për te demotivuar klientët e mëdhenj që furnizohen nga OSHEE. Kjo politike lehtëson OSHEE për të siguruar energji me detyrim për këto biznese me çmime më të ulët se tregu.
Çmimet e reja tashmë janë në proces miratimi nga Enti Rregullator të Energjisë./Monitor
