Më 27 shkurt 2017, u bë me dije se anëtarët e Autoritetit të Mbikëqyerjes Financiare kishin kërkuar shkarkimin nga detyra e kreut të AMF-së, Enkeleda Shehit.
Në shkresën që mbante datën 22 shkurt, ata i propozonin Kuvendit të Shqipërisë lirimin e znj.Enkeleda Shehi nga detyra e anëtarit të Bordit, në funksionin e Drejtorit të Përgjithshëm Ekzekutiv të AMF, ndikuar nga përplasjet mes kreut të AMF-së dhe anëtarëve të bordit, të dukshme prej vitit të kaluar për shkak të rekrutimeve brenda institucionit.
Më 6 mars, Komisioni i Ekonomisë vendosi për shtyrjen e vendimit për shkarkimin e drejtoreshës së AMF-së për shkak të mospranimit nga ana e demokratëve dhe përfaqësuesve të Lëvizjes Socialiste për Integrim.
Këta të fundit vijuan të mbanin të njëjtin qëndrim edhe në mbledhjen e komisionit më 9 mars të këtij viti, kur u vendos shkarkimin e saj. Në këtë mbledhje u votua me 9 vota pro dhe 2 kundër shkarkimit të Enkeleda Shehit.
Dy votat kundër ishin të Gjovalin Kadelit dhe Gledion Rahovicës. “AMF është një institucion delikat financiar. Argumentet për shkarkimin e Shehit janë të pamjfatueshme. Jap votën kundër pasi nuk pati transparencë dhe procesi ishte i nxituar dhe jo objektiv. Çdo ndërhyrje pa vend në AMF është tronditje për tregun financiar.”, u shpreh Kadeli, qëndrim i zbardhur nga “Shuplaka”.
Erion Braçe u shpreh se shkarkimi i saj ishte vendimi i duhur për të çliruar institucionin. Megjithatë, LSI ka vijuar me qëndrimin kundër të saj edhe në seancën e sotme plenare.
Me shumicë, 55 vota pro, Kuvendi vendosi pro shkarkimit të Enkeleda Shehit nga detyra e kreut të AMF-së. Pavarësisht se nuk mundi ta bllokonte, LSI vendosi deri në fund t’i thoshte “Jo” shkarkimit të saj.
(XH.A/SHUPLAKA)
Discussion about this post