Ditën e djeshme në Kuvend u zyrtarizuan dhe dy grupet e reja parlamentare, të PD-së dhe të deputetëve të pavarur, po që në nisje të ‘’aventurës” së re, prurjet e reja janë kapur në shkelje. Kjo pasi në nenin 15-të të Rregullores së Kuvendit, deputetët mund të formojnë grupe parlamentare sipas përkatësisë partiake ose orientimit politik.
Më tej në pikën dy specifikohet se: “Për krijimin e një grupi parlamentar kërkohet një minimum prej 7 deputetësh. Çdo deputet mund të jetë anëtar vetëm i një grupi parlamentar. Një deputet që largohet nga grupi parlamentar, mund t’i bashkohet një grupi tjetër parlamentar vetëm pas gjashtë muajve nga data e largimit”.
Pikërisht në këtë pikë është bërë edhe shkelja. Grupet e reja të ngritura morën emërtesën “Grupi Parlamentar Demokrat” i deputetëve që u futën në Parlament nga lista e PD-së dhe në krye u vendos Rudina Hajdari dhe “Grupi Parlamentar i Pavarur” i deputetëve që u futën nga lista e LSI-së ku si kryetar zgjodhën Nimet Musain, shkruan Panorama.
Në rastin e Grupit Parlamentar të PD-së është bërë shkelja e Rregullores së Kuvendit me dy anëtarët e saj. Kjo, pasi Rudina Hajdari dhe Myslym Murrizi kanë qenë anëtarë të Grupit Parlamentar të PD-së deri në datën 21 shkurt kur u mor edhe vendimi për djegien e mandateve. Kësisoj, nuk është konsumuar harku kohor prej 6 muajsh, në mënyrë që Rudina Hajdari dhe Myslym Murrizi të bëheshin pjesë e një grupi tjetër duke vënë në pikëpyetje edhe vijimin e ekzistencës së këtij formimi politik brenda Kuvendit.
PËRÇARJA
Ndonëse u futën në Parlament me qëndrimin për të krijuar një frymë të re në politikën shqiptare, zëvendësuesit e PD-së dhe të LSI-së janë përçarë brenda tyre. Në faqen e Kuvendit janë publikuar emrat e anëtarëve të secilit grup të krijuar. Tek ai Demokrat janë: Rudina Hajdari, Myslym Murrizi, Arlind Çaçani, Halil Jakini, Alban Zeneli, Korab Lita dhe Arben Elezi.
Pjesë e këtij grupi nuk janë bërë deputetët e tjerë të futur në Parlament nga lista e PD-së si: Ligoraq Karamelo, Adriatik Alimadhi, Majlinda Halilaj dhe Lefter Maliqi. Ndërsa në grupin e “Pavarur” janë pjesë: Nimet Musai, Ralf Gjoni, Erdiola Braha, Ylli Shehi, Aurora Mara, Edlira Hyseni dhe Enver Roshi. Pjesë e kësaj liste nuk është Lefeter Koka, i cili nuk pranoi të digjte mandatin apo edhe deputetë të tjerë si Edmond Rrushi, Elda Hoti, Amra Borava, Enada Kapllani.
GRUPI PARLAMENTAR DEMOKRAT (PD)
Rudina Hajdari
Myslim Murrizi
Alban Zeneli
Arben Elezi
Arlind Çaçani
Halil Jakini
Grupi Parlamentar i Pavarur (LSI)
Erdiola Braha
Ralf Gjoni
Nimet Musai
Ylli Shehi
Aurora Mara
Edlira Hyseni
Enver Roshi
Nuk janë futur në grupet parlamentare
PD: Ligoraq Karamelo, Majlinda Halilaj, Lefter Maliqi, Adriatik Alimadhi
LSI: Lefter Koka, Enda Kapllani, Edmond Rrushi, Elda Hoti, Ambra Borova
