Shpresa se kandidati i pavarur i qendrës Emmanuel Macron do të mundë në raundin e dytë ekstremisten Marine Le Pen ka reduktuar shqetësimet se një eurokeptike do të drejtojë ekonominë e dytë më të madhe të eurozonës.
Euro në bursa u rrit me 1.4% gjatë ditës së sotme në $1.0872, niveli më i lartë që nga muaji mars. “Tregjet po vlerësojnë fitoren e Macron,” tha Jordan Rochester, një analist i tregjeve të huaja në Nomura. “Macron është pro euro, pro biznes.”
Perspektiva e Le Pen për të marrë presidencën ka qenë goditja më e madhe e këtij viti për monedhën e përbashkët. Euro, në të kundërt, është mbështetur nga forcimi i ekonomisë së eurozonës dhe nga largimi i frikës së deflacionit që dominoi gjysmën e parë të vitit të shkuar.
Por, sjellja në tregun e brendshëm valutor, ka qenë e pandikuar nga optimizmi i lartë për euron. Sipas kursit zyrtar të Bankës së Shqipërisë, një euro u këmbye sot me 134.91 lekë, 0.02 lekë më pak se fundi i javës së kaluar, duke vijuar tendencën rënëse të javëve të fundit.
Ky është niveli i ri më i ulët i këtij viti, pas atij që u vendos të premten e kaluar. Për të ruajtur raportet me bursat ndërkombëtare, dollari ka rënë edhe më fort në tregun vendas, me 1.75 lekë në 124.25 lekë.
Ekspertët e tregut pohojnë se arsyeja kryesore e nënçmimit të euros në tregun vendas, pavarësisht se ai u rrit fort sot në bursa, lidhet me ofertën e lartë në valutë në Shqipëri, sipas tyre vjen nga aktivitete të ligjshme, por edhe kriminale./ Revista Monitor
