Maxhoranca mundi të marrë maksimumin nga deputetët e pranishëm në sallën e Kuvendit në votimin për paketën anti-KÇK, kur atë e votuan pro 89 deputetë.
Ajo që ra në sy dje në Parlament ishte mungesa e zëvendëskryeministrit Erion Braçe gjatë gjithë seancës së debatit, por dhe votimi i tetë deputetëve të tjerë. Fatmir Xhafaj, Senida Mesi, Roland Xhelili, Jurgis Çyrbja, Musa Ulqini, Lindita Nikolla, Robert Bitri dhe Bashkim Fino nuk ishin dje në votim, për arsye që të paktën publikisht nuk dihen.
Zëvendëskryeministri mungoi edhe gjatë tri ditëve të zhvillimit të Kongresit të PS javën e shkuar, edhe pse vetë ai nuk e quajti bojkot të Kongresit. Një tjetër mungesë domethënëse gjatë votimit të djeshëm në radhët e socialistëve, ishte ajo e ish-ministrit të Brendshëm dhe ish-kryetarit të Komisionit të Posaçëm të Reformës në Drejtësi, Fatmir Xhafaj.
Xhafaj nuk mori pjesë në fund të seancës në votim, dhe jo vetëm kaq, por ai u tërhoq dhe nga diskutimi i tij për aktin normativ të paketës antiKÇK. Xhafaj ishte në tetë deputetët, përfshirë dhe ministrin Lleshaj, që do të diskutonin dje në Parlament për këtë paketë.
Për Kryeministrin Rama, Paketa anti-KÇK është një goditje që maxhoranca do t’i japë krimit, duke u marrë atyre pasurinë e vënë përmes kësaj veprimtarie. Për rëndësinë që anti-KÇK ka për maxhorancën, ditën e prezantimit të kësaj pakete Kryeministri kërkoi votimin e saj pa kushte nga deputetët e tij. Kryeministri Rama paralajmëroi deputetët socialistë se kush nuk do ta votojë Paketën anti-KÇK, do të përjashtohet nga Grupi Parlamentar, shkruan Panorama.
“Kërkoj mbështetjen e Grupit Parlamentar të PS-së për Paketën speciale anti-KÇK. Kush nuk e voton këtë paketë, përjashtohet nga Grupi Parlamentar i PS-së”, u shpreh Rama më 25 nëntor 2019, kur e prezantoi këtë paketë. Mungesa e dy deputetëve në votimin e kësaj pakete pritet që ta vërë në vështirësi Kryeministrin për të mbajtur ose jo fjalën e tij dhënë publikisht para Grupit Parlamentar, por edhe zyrtarëve të lartë të administratës publike në vend.
VOTIMI NE KUVEND
89 pro
17 kundër
3 abstenime
Munguan në votim
Erion Braçe
Fatmir Xhafaj
Bashkim Fino
Senida Mesi
Roland Xhelili
Jurgis Çyrbja
Musa Ulqini
Lindita Nikolla
Robert Bitri
Discussion about this post