Duket se marrëveshja e këtyre ditëve mes Monika Kryemadhit dhe Lulzim Bashës nuk po funksionon si duhet në pushtetin lokal.
Pas disa votave që rrodhën nga LSI-ja drejt PS-së në Këshillin Bashkiak në Tiranë, e njëjta situatë është paraqitur edhe në Durrës gjatë ditës së sotme.
Në mbledhjen e Këshillit Bashkiak të Durrësit ku u miratua Buxheti për vitin e ardhshëm, 4 përfaqësues të LSI-së dhe një i PR-së bashkuan votat me PS-në duke bërë që 26 vota të ishin pro miratimit të Buxhetit. Nga ana tjetër PD-ja dhe këshilltarët e saj bojkotuan mbledhjen.
Po ashtu në këtë mbledhje është miratuar paketa fiskale me të gjitha ndryshimet e propozuara. Kështu Dako nuk do të shqetësohet për vitin e ardhshëm, pasi ende vijon të ketë të siguruar shumicën e votive në Këshillin Bashkiak.
Nuk dihet sesi LSI-ja në Durrës do të argumentojë këtë qëndim pro, apo edhe këta 4 këshilltarë kanë vepruar me mendjen e tyre. Dako ka qenë një nga kryebashkiakët të sulmuar fort nga ana e Partisë Demokratike për lidhjet e tij me krimin e organizuar në qytetin bregdetar. Po ashtu nuk dihet nëse do të ketë edhe ndonjë reagim nga kryeopozitari Basha.
(E.K/FAXWEB)
Discussion about this post