Presidenti maqedonas, Gjorge Ivanov, ka refuzuar dekretimin e emrit të Maqedonis së Veriut si dhe 11 ligje që janë miratuar nën këtë emër.
Sipas informacioneve të dhëna nga Kuvendi i Maqedonisë së Veriut, bëhet fjalë për ligje të fushave të ndryshme në ekonomi, marrëveshje për bashkëpunim mes shteteve, marrëveshje për shërbimet e sigurisë, për shërbime në armatë, ligjin për komunikime elektronike, për qasje të lirë në informacionet e karakterit publik e të tjera.
Ivanov, nuk i dekretoi ligjet me arsyetimin se “gjatë ushtrimit të funksionit, gjithmonë ka vepruar në bazë të betimit të dhënë se do të mbrojë Kushtetutën dhe interesat e Republikës së Maqedonisë”.
Kuvendi bëri me dije se kreu i shtetit nuk i ka dekretuar as ligjet që ishin miratuar me dy të tretat e votave, që kryesisht kanë të bëjë me reformat në gjyqësor, e që konsiderohen si kyçe për procesin e integrimit evropian të Maqedonisë së Veriut.
Ligjet janë miratuar pas 11 janarit, kur u miratuan dhe ndryshimet kushtetuese për ndryshimin e emrit të Maqedonisë në Republika e Maqedonisë së Veriut.
Ivanov e ka kundërshtuar Marrëveshjen me Greqinë për ndryshimin e emrit, të arritur më 17 qershor, 2018, duke thënë se ajo nuk është në interesa të shtetit.
Ivanov ka refuzuar edhe më parë dekretimin e ligjeve, për përdorimin e gjuhëve dhe ratifikimin e Marrëveshjes me Greqinë, ku sipas tij ky ligj bie ndesh me vlerësimin se “ligjet që bien ndesh me Kushtetutën rrezikojnë identitetin dhe gjuhën maqedonase”.
