Në një kohë kur të gjithë janë në pritje të një koalicioni mes Lëvizjes Vetëvendosje dhe Lidhjes Demokratike të Kosovës, media kosovare kanë nxjerrë detaje, dhe cilat janë përplasjet më të mëdha mes tyre.
Burime të Kohës Ditore kanë thënë të hënën se është LDK-ja ajo, e cila refuzon që këto dy parti që kanë dalë të parat në zgjedhjet e parakohshme të 6 tetorit, të udhëheqin me numër të barabartë dikasteresh qeveritare.
Vota popullore i renditi si subjekte të para partitë kryesore opozitare, të cilat në garën elektorale prezantuan programe jo pak ambicioze dhe premtuan standard të ri qeverisës.
LVV-ja, një subjekt që i përket spektrit të majtë, për herë të parë ka dalë parti e parë për nga numri i votave. Rezultatet paraprake kanë treguar se pro saj ishte 25.5 për qind e trupës votuese. Në anën tjetër, LDK-ja, parti e djathtë, është renditur e dyta me 24.8 për qind të votave. Ajo në disa mandate ka qenë në pushtet, por vetëm diçka më shumë se dy vjet ka drejtuar Qeverinë.
Përpara zgjedhjeve, kishin dështuar negociatat mes këtyre partive për të garuar si koalicion. Ndërkaq, pak ditë pas mbajtjes së tyre, kanë vënë komunikime zyrtarët më të lartë partiakë dhe kanë deklaruar besimin se do të bashkëqeverisin.
Por, sipas një burimi të besueshëm, në LDK duan që subjekti nga i cili del kryeministri, të ketë 4 ministri më pak sesa partneri i dytë qeverisës.
(E.K/Faxweb.al)
Discussion about this post