Një foshnjë një-vjeçare në Kanada është qëlluar për vdekje në një incident që përfshin oficerë të policisë të cilët hapën zjarr në një kamionçinë ndërsa iu përgjigjën një rrëmbimi të pretenduar.
Sipas The Guardian, hetuesit ende nuk kanë konfirmuar nëse policia e vrau djalin e vogël.
“Është shumë herët për ne të dimë pse oficerët qëlluan në drejtim të automjetit dhe është shumë herët për ne të dimë saktësisht se çfarë ndodhi”, u tha gazetarëve Monica Hudon, një zëdhënëse e mbikëqyrësit të policisë së provincës.
Siç bëhet e ditur, në mëngjes oficerët në komunitetin në Kaëartha Lakes në Ontario u njoftuan për një mosmarrëveshje në një shtëpi që përfshinte të shtëna me armë zjarri dhe rrëmbimin e dyshuar të njëvjeçarit nga babai i tij.
Policia së shpejti lokalizoi automjetin e babait përgjatë një rruge rurale të vendit.
Pasi policia u përpoq ta ndalonte atë, kamioni u përplas me një makinë policie dhe një automjet tjetër. Një oficer që qëndronte afër makinës së policisë u godit nga kamioni dhe u plagos.
Tre oficerët më pas qëlluan me armë drejt automjetit, sipas Njësisë Speciale të Hetimeve. Fëmija ishte në ulësen e pasme të kamionçinës.
“Brenda automjetit ishte një djalë njëvjeçar”, tha SIU në një deklaratë. “Ai kishte pësuar një plagë me armë zjarri dhe u shpall i vdekur në vendin e ngjarjes”.
Babai 33-vjeçar u qëllua nga të shtënat me armë të policisë dhe u soll në një spital “në gjendje të rëndë”. Oficeri i cili u godit nga kamioni po shërohet në një spital të Torontos.
Discussion about this post