Zbardhet debati me dyer të mbyllura mes kreut të Kuvendit, Gramoz Ruçi dhe ish-kryetares së Komisionit të Medias, Fatjona Dhimitri, e cila u zëvendësua në detyrë nga Ramazan Gjuzi, deputet i opozitës së re.
Gjatë mbledhjes me dyer të mbyllura të Konferencës së Kryetarëve, Fatjona Dhimitri ka akuzuar kreun e Kuvendit se është ai që ka urdhëruar shkarkimin e saj, pasi doli kundër emërimit të Skënder Gjinushit si kryetar i Akademisë së Shkencave. Po ashtu sipas saj ajo ka kundërshtuar ashpër dhe ministren Besa Shahini gjatë seancave dëgjimore.
“Unë kam bllokuar komisionin për sa i përket procedurës së përzgjedhjes së kryetarit të AMA-s. Po cilin kryetar të AMA-s kërkoni të përzgjidhni ju, zoti Kryetar, së bashku me ju, anëtarë të Konferencës së Kryetarëve, djalin e Pirro Mishës, këshilltarët ligjorë të Olta Xhaçkës, pjesëtarë të partive politike?! Çfarë doni ta ktheni AMA-n? Në gjyq?! Doni të vendosni regjimin absolut mbi mediet?! Doni të vendosni censurën mbi mediet?!”, thekson Dhimitri, e cila ka thënë se kjo do ishte seanca e fundit e pranishme në mbledhjen e Konferencës së Krytarëve.
Ndërkohë që Gramoz Ruçi e ka quajtur këtë reagim të demokrates si “nxjerrje dufi”.
“Partia juaj po mundohet të më mbyllë gojën mua dhe pikërisht këtë po e vendos edhe përmes shkarkimit tim. Çfarë dufi, zoti Kryetar?! Dufin po e nxirrni ju, dufin po e nxjerr partia juaj me mua, duke urdhëruar shkarkimin tim; po, shkarkimin tim për të më mbyllur gojën mua për thënien e të vërtetave”, ka theksuar ajo.
Por në debat është përfshirë edhe Edmond Stojku, kryetari i Grupit për Demokraci dhe Drejtësi, i cili ka thënë se shkarkimi i Fatjona Dhimistrit s’ka lidhje me mbylljen e gojës, por për të zbatuar ndarjen e posteve në mënyrë proporcionale. “E dëgjova pak më parë zonjën Dhimitri dhe nuk arrij të kuptoj ç`lidhje ka goja këtu me rregullat e Parlamentit, ndarjet proporcionale mes grupeve. Nuk di, nuk arrij të kuptoj, ç`lidhje ka edhe Teatri Kombëtar me shkarkimin e saj”, ka thënë Stojku.
Të njëjtën linjë ka mbajtur edhe Gramoz Ruci, i cili ka deklaruar gjatë seancës me dyer të mbyllura se: “Zonja Dhimitri, më vjen keq që mendoni se maxhoranca apo unë e kam me qejf t’ju shkarkoj. Jo, nuk ka shkarkim. S’kam asnjë të drejtë të shkarkoj asnjë kryetar komisioni, as maxhoranca.
Për komisionin që ju drejtoni ka një propozim dhe një kërkesë. Propozimi është nga grupi juaj parlamentar për t’ju zëvendësuar ju me një person tjetër dhe kërkesa është nga grupi parlamentar i porsakrijuar, që sipas Rregullores së Kuvendit kërkon një komision”.
Debati gjatë mbledhjes se Konferencës së Kryetarëve me dyer të mbyllura
Fatjona Dhimitri: Zoti Kryetar, ju lutem! Në komision e kam të pamundur që të realizoj seanca dëgjimore lidhur me këtë çmenduri që është bërë në vendin tonë me shembjen e kulturës, me shembjen e historisë, me humbjen e vlerave të identitetit kombëtar.
Përse po ndodh kjo, zoti Kryetar? Sepse vetë partia juaj po mundohet të më mbyllë gojën mua dhe pikërisht këtë po e vendos edhe përmes shkarkimit tim. Besoj se të gjithë anëtarët e Konferencës së Kryetarëve e kanë parë rendin e ditës, ku parashikohet jo zëvendësimi, por shkarkimi im dhe pikërisht ky shkarkim bëhet nga vetë maxhoranca, po, në përpjekje për të më mbyllur mua gojën për të thënë të vërtetën. Po cilat janë ato të vërteta?
Së pari, goja ime u hap për Akademinë e Shkencave, për sistemin komunist që ekziston në Akademinë e Shkencave, për vjedhjet abuzive që bëhen aty dhe për vetëshpalljen e “mbretit” Gjinushi.
Së dyti, ju thoni që unë kam bllokuar komisionin për sa i përket procedurës së përzgjedhjes së kryetarit të AMA-s. Po cilin kryetar të AMA-s kërkoni të përzgjidhni ju, zoti Kryetar, së bashku me ju, anëtarë të Konferencës së Kryetarëve, djalin e Pirro Mishës, këshilltarët ligjorë të Olta Xhaçkës, pjesëtarë të partive politike?! Çfarë doni ta ktheni AMA-n? Në gjyq?! Doni të vendosni regjimin absolut mbi mediet?! Doni të vendosni censurën mbi mediet?!
Gramoz Ruçi: Zonjushë Dhimitri, ju lutem!Fatjona Dhimitri: Zoti Kryetar, më lini të shprehem, ndonëse kjo mund të jetë hera e fundit që mund të jem prezente në Konferencën e Kryetarëve, ju lutem!
Gramoz Ruçi: Do të nxjerrësh dufin, po nuk është për duf Konferenca e Kryetarëve!
Fatjona Dhimitri: Çfarë dufi, zoti Kryetar?! Dufin po e nxirrni ju, dufin po e nxjerr partia juaj me mua, duke urdhëruar shkarkimin tim; po, shkarkimin tim për të më mbyllur gojën mua për thënien e të vërtetave. Thërrasim në seancë dëgjimore Besa Shahinin, dhe Besa Shahini nuk reagon aspak për përgjigjet e pyetjeve, por përgjigjet siç dëshiron ajo dhe aspak për të vërtetat në të cilat gjendet sot sistemi arsimor. Shembet historia, shembet Teatri dhe askush nuk reagon, heshtje në komision. Nuk më jepet mundësia të realizoj seanca dëgjimore. Pse? Kjo përmes artificave, përmes grupeve false, përmes palaçove politikë të krijuar nga maxhoranca, përmes këtyre grupeve palaço, që sot kërkojnë të më marrin drejtimin e komisionit për të më mbyllur mua gojën, por kurrë nuk do ta realizojnë këtë, askush! Këto kisha unë
Edmond Stojku: Faleminderit, për fjalën që më dhatë.E dëgjova pak më parë zonjën Dhimitri dhe nuk arrij të kuptoj ç`lidhje ka goja këtu me rregullat e Parlamentit, ndarjet proporcionale mes grupeve. Nuk di, nuk arrij të kuptoj, ç`lidhje ka edhe Teatri Kombëtar me shkarkimin e saj. Dua të bëj me dije që është zbatuar një rregull proporcional, me të cilin, normalisht, besoj se të gjithë kanë qenë dakord. Mendoj që zonja Dhimitri nuk kishte lidhje në fjalën e saj.
Gramoz Ruçi: Zonja Dhimitri, më vjen keq që mendoni se maxhoranca apo unë e kam me qejf t’ju shkarkoj. Jo, nuk ka shkarkim. S’kam asnjë të drejtë të shkarkoj asnjë kryetar komisioni, as maxhoranca.
Për komisionin që ju drejtoni ka një propozim dhe një kërkesë. Propozimi është nga grupi juaj parlamentarpër t’ju zëvendësuar ju me një person tjetër dhe kërkesa është nga grupi parlamentar i porsakrijuar, që sipas Rregullores së Kuvendit kërkon një komision.
Dhe është kjo e dyta që është prioritare, pasi Rregullorja përcakton grupe parlamentare në mënyrë proporcionale. Duke qenë që opozita ka 3 komisione në drejtim dhe meqenëse janë 10 3 grupe parlamentare, atëherë seancës do t’i propozohet kjo, sipas nenit të Rregullores.
Miratohet apo nuk miratohet, kjo është e drejta ekskluzive juaja. Pra, s’ka punë shkarkimi për të mbyllur gojën tënde. Në qoftë se nuk do të kishte një kërkesë ose nuk do të kishte një grup, sigurisht do të hidhej për votim në parlament propozimi i grupit parlamentar, ku ti bën pjesë, për zëvendësimin tënd me një koleg tjetër./ Panorama
Discussion about this post