Detaje të reja janë zbuluar nga sulmi terrorist në Vjenë. Një i njohur i atentatorit të arrestuar Kujtim Fejzullai, terroristi nga Tetova foli para policisë duke thënë se u përpoq të merrte atentatorin në telefon kur dëgjoi për të shtënat në qendër të Vjenës.
21-vjeçari, i cili gjendet në paraburgim, pohoi se donte të kontaktonte me Kujtim Fejzullain për ta larguar atë nga plani i tij terrorist. Tani policia ka nisur punën për ta verifikuar me anë të regjistrimit të thirrjeve telefonike.
Në deklaratën para policisë tha se kurrë nuk do të besonte që Fejzullai do ta bënte një gjë të tillë. Por në të dhënat e siguruara nga agjensia e lajmeve APA, ky 21-vjeçar besohet se është njeriu që e ka shoqëruar atentatorin në muajin korrik në Sllovaki, ku ai tentoi të blinte municion për një pushkë sulmi.
Aktualisht janë dhjetë të arrestuar për sulmin në Vjenë dhe besohet se kanë bërë vizitë në shtëpinë e Fejzullait vetëm pak orë para ngjarjes. Supozohet se Kujtim Fejzullai e kishte bërë banesën gati për ndonjë përballje të mundshme me policinë. Ai kishte bashkuar mobiljet në çdo cep të shtëpisë dhe kishte bërë municionet gati. (A.M/Faxweb.al)
Discussion about this post