Një atentat ka ndodhur në afërsi të fshatit Fushë Dukat në Vlorë, ku është qëlluar me të paktën 8 plumba ndaj një makine në lëvizje. Si pasojë e të shtënave ka mbetur i vdêkur 30-vjeçari Benjamin Bezhanaj.
Policia e Shtetit ka ngritur postoblloqe në të gjithat pikat kyçe nga mendohet se mund të jenë larguar autorët e krimit. Si pasojë e të shtënave viktima ka humbur kontrollin e mjetit dhe ka dalë nga rruga. Sipas informacioneve paraprake në mjetin tip Benz të 30-vjeçarit është gjetur një armë zjarri.
Burime bëjnë me dije se viktima ka qenë i dënuar më parë në Itali dhe kishte vetëm pak ditë që ishte kthyer. Atij i është bërë pritë në hyrje të fshatit, kur po kthehej në banesë pasi kishte çuar të fejuarën në shtëpinë e saj.
I riu nuk është skeduar asnjëherë nga policia shqiptare. Është e paqartë përse ka ndodhur atentati ndaj tij pasi rezulton i qetë dhe pa probleme. Edhe banorët thonë se nuk dinë ndonjë rast që të ketë qenë i përfshirë në ndonjë çështje apo probleme të mëparshme.
Policia bën me dije detajet e para duke thënë se ishte një telefonatë që i njoftoi për atentatin dhe ngriti në këmbë oficerët për të mbërritur me urgjencë në vendin e ngjarjes.
Njoftimi i plotë i policisë:
Më datë 01.12.2020, rreth orës 21:00, në Sallën Operative Vlorë ka ardhur një telefonatë nga një qytetar se në Fushë- Dukat, Orikum një automjet ka ndaluar në rrugë dhe brenda tij ka një person të pa jetë.
Menjëherë kanë shkuar shërbimet e Policisë dhe kanë konstatuar të pajetë shtetasin B. B., rreth 27 vjeç, dyshohet ka humbur jetën nga përdorimi i armës së zjarrit.
Shërbimet e Drejtorisë Vendore të Policisë Vlorë dhe të Stacionit të Policisë Orikum kanë ngritur pika kontrolli dhe po kontrollojnë zonën për shoqërimin e personave të dyshuar si autorë të ngjarjes apo që mund të kenë dijeni për ngjarjen.
Grupi hetimor nën drejtimin e Prokurorisë po vijon punën për sqarimin e rrethanave të ngjarjes, me qëllim identifikimin dhe kapjen e autorëve.
(F.M/Faxweb.al)
Discussion about this post