Kapet 53 kg kanabis, policia jep detaje për operacionin “Tragjasi”: 1 i arrestuar, procedohet kryeplaku dhe elektricisti

Një sasi prej 53 kg lëndë narkotike kanabis është sekuestruar nga policia në kuadër të një operacioni të koduar “Tragjasi”.

Policia e Vlorës bën me dije se ka arrestuar dy persona dhe një tjetër është shpallur në kërkim.

Gjatë kontrollit të banesës së njërit prej të arrestuarve, u gjetën edhe disa fidanë kanabisi, 1 armë zjarri automatike, 3 armë gjahu teke, 2 thika dhe 1 shpatë.

“Në vijim të kontrollit të pandërprerë të territorit, me qëllim parandalimin, evidentimin dhe goditjen e rasteve të tentativës për kultivim të bimëve narkotike, shërbimet policore të Drejtorisë Vendore të Policisë Vlorë, kanë finalizuar operacionin “Tragjasi”, si rezultat i të cilit janë arrestuar dhe proceduar penalisht autorët e përfshirë në këtë veprimtari të paligjshme, konkretisht: Janë arrestuar shtetasit P. S., 37 vjeç, banues në fshatin Drashovicë dhe G. B., 25 vjeç, banues në Tiranë. Janë proceduar penalisht shtetasit M. R., 43 vjeç, banues në fshatin Tragjas, me detyrë kryeplak i fshatit Tragjas dhe shtetasi A. R., 37 vjeç, banues në fshatin Tragjas, me detyrë elektricist i zonës në fshatin Tragjas. Si dhe u shpall në kërkim shtetasi T. T., 53 vjeç, banues në Tiranë.” – njofton policia.

Nga kontrolli dhe hetimet e kryera ka rezultuar se këta shtetas, në bashkëpunim me njëri-tjetrin kanë kultivuar fidanë të dyshuar canabis sativa në territorin e banesës së shtetasit G. B., në fshatin Tragjas.

Po ashtu, në banesën e shtetasit G. B është gjetur dhe sekuestruar një sasi prej 53 kg lëndë narkotike e dyshuar cannabis.