Ngjarjet e fundit në Kosovë, pengimi i trenit serb të hyjë në Kosovë dhe reagimet e Prishtinës dhe Beogradit po tërheqin vëmendjen edhe të opinionit publik në Shqipëri.
Sociologu Ergys Mërtiri shkruan se, Serbia ka krijuar një ishull territorial në Kosovë, duke patur parasysh atë që po ndodh në Mitrovicë, ndërsa ironizon edhe me reagimin e kryeministrit Edi Rama.
“Rama mjaftohet me një status në facebook si reagim, ku edhe aty, shpërndan valium, duke na mbushur mendjen se gjithçka që serbët po bëjnë e kanë kot, për të keqen e tyre”, shkruan Mërtiri.
Postimi i plotë:
Serbët kanë krijuar një ishull territorial brenda Kosovës, kanë bllokuar urën qe ndan Mitrovicën nga pjesa tjetër e vendit, kanë terrorizuar njerëz që kanë guxuar të dalin përtej, kanë bërë inekzistent kufirin me Serbinë duke fortifikuar kufirin me pjesën tjetër të Kosovës, dhe të gjithë kemi fjetur gjumë. Ndërsa Europa është kujdesur të dënojë ata që kanë bërë thirrje për tu zgjuar.
Kjo vetëm sa i ka shtuar orekset e serbëve. Ata duan tashmë edhe linja hekurudhore me Mitrovicën pa pyetur për autoritetet kosovare dhe kur kjo pengohet nga shteti i Kosovës, kërcënojnë me luftë.
Megjithatë Kocijancic reagoi ndaj serbëve duke iu bërë thirrje palëve të ulin tensionet. Kjo është paanshmëri!
Ndërkohë Rama mjaftohet me një status në facebook si reagim, ku edhe aty, shpërndan valium, duke na mbushur mendjen se gjithçka që serbët po bëjnë e kanë kot, për të keqen e tyre! (A.R/SHUPLAKA)
Discussion about this post