Nga negocimi me Hoyt Brian Yee mësohet se Rama e ka refuzuar paketën e McAllitser. Nga ana tjetër Basha ka pranuar që të votojë vettingun, veprim ky ndryshe i menduar nga Rama i cili kishte dyshime mbi opozitën.
Ndërkohë Spartak Ngjela ka qenë një nga ata figura që ka mbështetur më së shumti Ramën në debatin për reformën në dtrejtësi dhe vettingun.
Avokat Ngjela shkruan sot se pas zbarkimit të Departamentit Amerikan të Shtetit në Tiranë, kryeministri Rama duhet të tregojë nëse me të vërtetë e do apo jo Vettingun e shumë trumbetuar prej tij këto muaj.
“Rama: Primar është vettingu. Sot për këtë testohesh edhe ti nëse e do apo bën sikur”,-shkruan Ngjela në shkrimin e tij në rrjetet sociale.
POSTIMI I NGJELES:
Korrupsioni shqiptar lodhet kot: duhet t’i dorëzohet ligjit.
Pse i bini kaq gjatë o të mjerë!
Një vuajtje e gjatë është torturë.
Departamenti i Shtetit Amerikan është në Tiranë.
Asgjë nuk do të bëni dot, duhet të shkoni në Parlament dhe të votoni ndëshkimin e korrupsionit se ky akt është në ndihmë të të gjithë shqiptarëve . Zhvillimi shqiptar pengohet sot nga korrupsioni shtetëror, dhe ky duhet shkatërruar- kjo është arsyeja e kohës sonë.
- Rama, primar është vetingu: sot, për këtë testohesh edhe ti nëse e do apo bën sikur.
- Po mendohet Saliu, thonë. Përse mendohet?
Kot mundohesh Sali: të kanë thënë që të zgjedhësh të keqen më të vogël: që të ndëshkohesh për një krim kombëtar dhe jo për një krim ndërkombëtar.
Kjo është gjuha e Departamentit të Shtetit Amerikën në Tiranë.
Çdo zgjatje është torturë.
Akuza nuk është helm, është çështje që duhet zgjidhur. Shqipëria nuk mund të ecë më duke mbajtur krimin brenda vetes në shoqërinë e saj të lodhur. Shkoi shumë gjatë ky popull me krim të pandëshkuar: Një mbret vret kundërshtarët politikë me agjenturën serbe, merr dhe arin e bankës kombëtare dhe ikën. Të tjerë banditë krijojnë kampe përqëndrimi dhe vrasin gjithë intelektualizmin e lartë shqiptar; izolojnë Shqipërinë si burg, dhe nuk iu hyn as një gjemb në këmbë: sepse nuk ka drejtësi.
Dhe ja dhe këta të sotmit: njezet vjet abuzim, vjedhje dhe banditizëm shtetëror: por tani janë të kapur, dhe do të ndëshkohen për historinë e shkuar, historinë e sotme dhe për hir të historisë që vjen: ka ardhur koha që edhe shqiptarët të flasin realisht për drejtësinë e tyre. - Kjo është arsyeja historike që nuk i lë më të lëvizin: sorrollaten kot. Sot dhe nesër do shkojnë të firmosin kontrollin dhe akuzën kundër vetes: kjo është risia e aktualitetit historik shqiptar: dëmprurësit nuk do t’i gjykojë asnjë revolucion; asnjë gjykatë revolucionare, por paanësia e qytetërimit të lartë perëndimor.
Akuza, në Perëndim, është në thelb drejtësi e kualifikuar: kështu do të jetë edhe këtu.
Janë të detyruar që të gjithë: do të shkojnë në Parlament të votojnë për drejtësinë që do t’i kontrollojë dhe do t’i akuzojë… por gjithmonë me drejtësinë që vjen nga moraliteti.
(M.D/Shuplaka)
