Ngjela në krah të deputetes Hajdari: Ja çfarë marrëveshjeje do të prishë zyrtari i lartë amerikan që vjen në Shqipëri

Avokati Spartak Ngjela ka dalë në mbështetje të Rudina Hajdarit dhe deklaratave të forta që bëri ajo gjatë seancës së fundit në Parlament.

Përmes një statusi në rrjetet sociale kreu i Partisë Ligj dhe Drejtësi i ka dalë në krah deputetes së re të opozitës në Parlament, Rudina Hajdarit ku gjatë fjalimit të saj ajo u shpreh se: “Sistemi elektoral i 2008-s është marrëveshja antidemokratike e uzurpimit me radhë të pushtetit”.

Ngjela ndan të njëjtin mendim me deputeten  dhe thotë që ky do jetë dhe mendimi  i Zëvendës/ ndihmës Sekretarit të Shtetit amerikan që do të vijë në Tiranë në datë 9 prill.

“Duhet të thuhet qartë nga politika amerikane që grupi i Sali Berishës nuk ka më punë me Parlamentin dhe pengesa që i bën Rama reformës në drejtësi, po ashtu, duhet denoncuar hapur përpara shqiptarëve.

Dyshja Rama-Berisha nuk është me shqiptarët dhe nuk punon për ta, por për korrupsionin e tyre vetjak që ka ardhur si pasojë e uzurpimit të pushtetit.” shkruan avokati.