Zëvendëskryeministrja e re e Shqipërisë, Ledina Mandija, ka nisur paraditen e sotme nga puna. Raportohet se ajo është takuar me tri ministra të Lëvizjes Socialiste për Integrim.
Në takimin e thirrur nga Engjëll Agaçi, ku u bë prezantimi i saj në krye të kësaj detyre, ishin të pranishëm ministrja e Integrimit, Klajda Gjosha, ai i Transportit, Sokol Dervishaj dhe ministri i Mjedisit, Lefter Koka. Nuk dihet përse u thirrën vetëm tre ministra dhe kryesisht të LSI-së, nga i gjithë kabineti i ministrave.
Mësohet se në këtë takim u diskutua mbi procesin zgjedhor të zgjedhjeve të përgjithshme parlamentare që do të mbahen më 25 qershor, ku Mandija kërkoi që administrata të mos përdoret për fushata zgjedhore.
Ledina Mandija është zv/kryeministrja e re, e cila zë vendin e Niko Peleshit pas marrëveshjes Rama-Basha.
(XH.A/SHUPLAKA)
