Mesa duket kanë filluar shkëndijat e para të përplasjeve PD-PS jashtë çadrës së protestës. Duke iu referuar takimit që zhvilloi kryeministri Rama me fermerët në Korçë, PD thotë që ai po përpiqet t’i mbushë ata me mashtrime të reja.
Pasi e ktheu vendin në një narko-shtet, thuhet nga PD, Rama kërkon që sërish ti gënjejë ata.
Duhet thënë se tonet e kryeministrit Rama dukeshin më të qeta sot, duke thënë se me shtyrjen e zgjedhjeve për një jave fituan të gjithë shqiptarët.
DEKLARATA E PD-së:
Pasi i braktisi për 4 vite fermerët shqiptarë, pasi ndërtoi një narko-shtet dhe vendosi gjithcka në shërbim të miqve dhe klientelës, Edi Rama predikon sot mashtrime të reja.
Në 4 vite, Edi Rama nuk bëri asnjë investim në infrastrukturë dhe mijëra hektarë u përmbytën rregullisht duke sjellë pasoja katastrofike për prodhimin e fermerëve.
Në 4 vite, numri i përfitueseve nga skema e subvencionit është ulur mbi 5 herë. Përfituan cdo vit vetëm 14 tregtare, kliente të qeverisë që morën mbi 70% të buxhetit të bujqësisë.
Cmimet për imputet bujqësore u rritën deri në 30%.
Cmimi i naftës u rrit me 30 përqind.
Partia Demokratike ka një projekt të realizueshëm dhe ambicioz që do të transformojë bujqësinë dhe do nxjerrë zonat rurale nga varfëria.
150 milionë euro do të investohen cdo vit në këtë sektor.
100 milionë euro në formën e subvencioneve direkte për cdo familje fermere bazuar vetëm mbi prodhimin e tyre.
50 milionë euro investime në infrastrukturë si vaditje dhe kullim, rregullim tregjesh dhe siguri ushqimore.
Prodhimet e fermerëve shqiptarë do të mbrohen përmes tarifave doganore nga importet e oligarkëve të Ramës.
Kjo do të ndodhë me 25 qershor, kur fermerët shqiptarë së bashku me qytetarët në mbarë Shqipërinë do ti japin fund me votën e tyre të lirë, republikës së vjetër që i zhvati, mashtroi dhe varfëroi dhe do të votojnë për projektin kombëtar të Republikës së Re, Republikës së qytetarëve. (E.K/SHUPLAKA)
Discussion about this post