Mbrëmjen e sotme nis në Pallatin e Kongreseve, edicioni i 55-të i Festivalit të Këngës në RTSH, i konceptuar në 3 net dhe që pritet të sjellë shumë të reja. Në garën e këtij viti marrin pjesë 24 këngëtarë e grupe, qoftë të rinj të dalë nga “talent shoë” por dhe emra të njohur për skenën shqiptare.
Edicioni i këtij viti mban emrat e Alfred Kaçinarit, Shpëtim Saraçit, Florent Boshnjakut, Gent Rushitit dhe Bojken Lakos. Në këtë festival, këngëtarja Ledina Çelo rikthehet si drejtuese për të dytën herë pas 13 vitesh, kësaj here në shoqërinë e aktorit Kasem Hoxha.
E pyetur lidhur me ndonjë pjesëmarrje të mundshme të saj si këngëtare në Festivalin e RTSH-së, Ledina Çelo tha për “Gazetën Panorama” se për momentin ka hequr dorë nga garat: “Ndoshta do të jetë kështu përgjithmonë, por ndoshta edhe ndryshoj mendim në të ardhmen. Mendoj që duhen parë më me prioritet të rinjtë. Ne e bëmë historinë tonë në festival. Tani është radha e tyre.”
Megjithatë këngëtarja zbuloi se nuk ka hequr dorë nga projektet muzikore, pasi ka gjithmonë një projekt muzikor në mendje e shtyrë nga vizitat e bëra në studiot e kompozitorëve me të cilët ka bashkëpunuar. (XH.A/SHUPLAKA)
