Delegacioni i Eurodeputetëve sapo ka nisur një takim me kreun e Partisë Demokratike Lulzim Basha dhe kryetaren e Lëvizjes Socialiste për Integrim, Monika Kryemadhi.
Ata do të takohen edhe me kreun e Kuvendit Ruçi, Ministrin e Jashtëm Gent Cakën, Kryeministrin Rama dhe pjesëtarë të shoqërisë civile midis tyre edhe dy studentë si përfaqësues të atyre që morën pjesë në protestën që nisi në fillim të dhjetorit të kaluar dhe u mbyll në fund të muajit janar, të cilët paraqitën 8 kërkesa adresuar qeverisë për situatën në të cilën ndodhen universitetet.
Me kreun demokrat Basha dhe atë të LSI-së Kryemadhi, delegacioni mendohet se po diskuton mbi situatën politike në vend ku djegia e mandatevë të deputetëve të opozitës ka krijuar një krizë të re politike duke sjellë reagime të ashpra nga faktori ndërkombëtar.
Pjesë e delegacionit që po zhvillon takim me Bashën dhe Kryemadhin janë eurodeputetët:
Tunne Kelam (Kryesues),Cristian Preda, Knut Fleckenstein, Juan Fernando Lopez Aguilar, Bas Belder, Ilhan Kyuchyuk, Tamás Meszerics
Takimi po zhvillohet tek zyrat e BE-së në Tiranë. Gjatë ditës së sotme ata do të takohen me drejtuesit kryesor të vendit ndërkohë nesër para se të largohen nga Shqipëria Delegacioni ka në axhendë një konferencë për shtyp.
(F.GJ/FAXWEB.AL)
