Kryeministri i Kosovës Albin Kurti ka nisur vizitën e tij disa orëshe në Tiranë, ky fillimisht është pritur nga kreu i qeverisë shqiptare, Edi Rama.
Kurtit i është rezervuar një pritje zyrtare në kryeministri, ndërsa kjo është vizita e parë që ai bën jashtë vendit, që prej marrjes së detyrës rreth një javë më parë.
Gjatë vizitës në Tiranë, Kurti do të ketë një takim dhe me presidentin Meta, si dhe me kreun e Kuvendit Gramoz Ruçi, dhe kryebashkiakun e Tiranës Erion Veliaj, si dhe me kryedemokratin Lulzim Basha.
Kurti e kaloi doganën e Morinës që prej orëve të para të mëngjesit të sotëm, nën masa të shumta sigurie, me një eskortë me të paktën 10 makina.
Gjatë takimit me Ramën, Kurti pritet që të njihet dhe me idenë e Minishengenit Ballkanik, të cilën paraardhësi i tij në detyrë, Ramush Haradinaj nuk e pranoi në asnjë moment, dhe refuzoi të ishte pjesë e çdo takimi mes kryesuesve të shteteve.
Vetë Kurti i pyetur para marrjes së detyrës si kryeministër, është shprehur se do të dëshironte që për Minishengenin të fliste direkt me kryeministrin shqiptar, për të njohur më mirë dhe pikat e marrëveshjeve që janë nënshkruar.
Nga ana tjetër Kurti është përballur ditët e fundit, me një presion për heqjen e taksës 100% ndaj produkteve të Serbisë, ndërsa thirrja më e fundit i ka ardhur nga i dërguari i Trumpit në Kosovë, Grenell.
Kurti ishte shprehur se do ta hiqte taksën në momentin kur Serbia do ta njohë Kosovën.
(E.K/Faxweb.al)
Discussion about this post