Presidenti Bujar Nishani ka sqaruar nëse mund të realizohet shtyrja e zgjedhjeve të 18 qershorit, të dekretuara tashmë për tu mbajtur.
“Tensioni i lartë politik që është në vend nuk favorizon fushatën e pritshme elektorale, kjo është evidente. Ajo që do i bëja thirrje aktorëve politikë është të mos e kalonin situatën në tensione. Shtyrja e datës së zgjedhjeve nuk varet nga presidenti. Presidenti është i gatshëm të ofrojë kontributin e tij për sa e lejon Kushtetuta dhe tagri kushtetues. Shtyrja e zgjedhjeve mund të bëhet vetëm në dakortësi të palëve politike. S’ është në shërbim të partive e popullit. Edhe në këtë rast në Shqipëri ka precedentë. Ajo që unë do kërkoja ka të bëjë me angazhime konkrete të aktorëve politikë në vend për të ulur tensionin politik dhe jo për ta eskaluar atë.”, tha ai.
I pyetur se a është dakort me qeverinë teknike, Nishani tha se ai është president dhe se kjo është pjesë e debatit politik.
“Kjo është një kërkesë politike e opozitës, si President i Republikës kam qëndruar fort, jo vetëm neutral për të mos u përfshirë apo komentuar deklarata dhe akte. Padyshim që është e drejtë e çdo force politike, por kjo mbetet mes partive, kjo zgjedhet vetëm në tryezën e partive, nëse do të ketë një dakortësi të palëve, Rresidenti i Republikës është i gatshëm të lehtësuar dialogun.” u shpreh Nishani.
Presidenti i ri i Republikës duhet të zgjidhjet mes datës 17 prill dhe 3 maj të këtij viti, nga ky Parlament, ndërkohë që më 24 korrik përfundon mandati i Bujar Nishanit në këtë post. Gjatë konferencës për shtyp të mbajtur pasditen e së dielës, Kreu i Shtetit tha se është i gatshëm për një mandat të dytë nëse kjo do t’i propozohet nga një grup deputetësh.
“Nuk ka qenë një dëshirë imja e shprehur, por një gatishmëri. Ka një konotacion dallues në këtë. Procesi i zgjedhjes së presidentit është në Parlament, është parashikuar nga ky parlament me të drejtën e zgjedhjes së Presidentit para se të shpërndahet. Nëse unë do të kem propozim nga deputetë të Kuvendit të Shqipërisë për të rikandiduar, do ta gjykoj një kontekstin e realizmit, të arsyes dhe vullnetit politik, dhe nëse do të jetë i adresuar me qëllim për të ndërmarrë përgjegjësi politike do vijoj të mbetem në shprehjen e gatishmërisë”, tha Presidenti Nishani.
(M.D/ Shuplaka)
Discussion about this post