Për vdekjen e shkrimtarit të madh Dritëro Agolli ka reaguar dhe Presideni Nishani. Në mesazhin e tij kreu i vendit ka shprehur ngushëllimet e tij për këtë humbje të madhe të letërsisë dhe kulturës shqipe.
“Të dashur familjarë të Dritëroit të ndjerë,
Me hidhërim dhe dhimbje të thellë mësova lajmin e hidhur të ndarjes nga jeta të bashkëshortit, babait, gjyshit dhe njeriut tuaj të shtrenjtë e të pazëvendësueshëm.
Me këtë rast të trishtë dhimbjeje, më lejoni t’ju shpreh ngushëllimet e sinqerta, dhe në emër të qytetarëve shqiptarë, duke u përpjekur t’ju gjendem pranë shpirtërisht në këto çaste tejet të vështira!
Me ikjen nga kjo jetë të Dritëro Agollit, letrave shqipe do t’iu mungojë shkrimtari dhe poeti i ndritur, autori i një krijimtarie letrare të vyer e të pashtershme, që pasuron cilësisht e në mënyrë origjinale thesarin e trashëgimisë shpirtërore të popullit shqiptar.
Ndërsa shoqëria jonë humbi mendimtarin e kthjellët dhe veprimtarin me impakt të pamatshëm publik, i cili me kontributet e tij të rralla në dy periudha historike, la gjurmë të pashlyeshme si protagonist i lëvizjeve emancipuese përgjatë më shumë se një gjysmë shekulli si në art, ashtu edhe në politikën shqiptare të epokës së pluralizmit.
Edhe një herë ngushëllime dhe Dritëroit i pastë shpirti dritë në jetë të jetëve!
Bujar Nishani”, thuhet në mesazhin e ngushëllimit të Presidentit Bujar Nishani.
Mesazhet e ngushëllimit për humbjen e Agollit kanë qenë të pafundme gjatë ditës së djeshme. Ngushëllime të cilave iu janë bashkuar politikanë, njerëz të artit dhe çdo lexues që është rritur me veprën e Agollit. Ndërkohë trupi i tij do të përcillet nesër për në banesën e fundit. (E.K/SHUPLAKA)
