Nishani mbledh anëtarët e Kolegjit Zgjedhor: Qëndrojini Kushtetutës dhe ligjeve

Pavarësisht përpjekjeve dhe të kreut të shtetit Bujar Nishani ende nuk ka një marrëveshje mes palëve politike për zgjedhjet e Qershorit.

Edhe takimi i dytë dje mes Ramës dhe Bashës nuk rezultoi i suksesshëm, ndërkohë që sot Nishani ka thërritur anëtarët e Kolegjit Zgjedhor.

Gjatë fjalë së tij Nishani pohoi se veprimtaria e Kolegjit Zgjedhor është me rëndësi. Nga ana tjetër ai u bëri thirrje anëtarëve të Kolegjit që t’i trajtojnë me korrektësi konfliktet që do paraqiten gjatë zgjedhjeve.

“Me rëndësi veprimtaria e kolegjit zgjedhor. Trajtoni me korrektësi konfliktet që do paraqiten. Kolegji Zgjedhor duhet t’i qëndrojë kushtetutës dhe ligjeve”, theksoi ai.

NJOFTIMI I PRESIDENCËS:

Sot me datë, 04.05.2017 Presidenti i Republikës Bujar Nishani në cilësinë e Kryetarit të Këshillit të Lartë të Drejtësisë, mbështetur në nenin 147 të Kodit Zgjedhor thërriti në detyrë anëtarët e Kolegjit Zgjedhor i cili do të ushtrojë funksionet gjatë procesit zgjedhor në vend.

Në këtë takim, Presidenti pasi theksoi rëndësinë që ka çdo proces zgjedhor, vlerësoi edhe një herë, se sa e nevojshme dhe e domosdoshme, është ushtrimi i veprimtarisë së Kolegjit Zgjedhor për të trajtuar me korrektësi të gjitha konfliktet që do të paraqiten para tij nga subjektet e ndryshme, deri në përfundim të gjykimit të gjithë ankimeve lidhur me procesin zgjedhor.

Trupa gjyqësore përbërëse e Kolegjit Zgjedhor me eksperiencën e saj të gjatë në ushtrimin e veprimtarisë gjyqësore, do të jetë në lartësinë e duhur për të garantuar përmbushjen me shumë sukses të detyrës dhe misionit për të cilin ky Kolegj do të funksionojë.

Presidenti i Republikës dhe njëkohësisht, Kryetari i Këshillit te Lartë të Drejtësisë shprehu besimin dhe kërkoi nga Kolegji Zgjedhor, që të qëndrojë me bindje të plotë, vetëm Kushtetutës dhe ligjeve të Republikës, në respekt të të drejtave dhe lirive të njeriut, çka do të sjellë drejtësi dhe paanësi në kryerjen e detyrës. ​(E.K/SHUPLAKA)