Presidenti i Republikës Bujar Nishani ka pritur sot në takim senatorin amerikan John McCain, i cili më parë u takua edhe me kreun e opozitës Lulzim Basha si edhe me kreun e Kuvendit Ilir Meta. Mësohet se takimi ka zgjatur rreth 30 minuta.
“Jemi krenarë që jemi aleatë besnikë, të denjë e të sinqertë të Shteteve të Bashkuara të Amerikës, nga mbështetja e të cilave frymëzohemi edhe për lirinë e demokracinë tonë.” tha Nishani në këtë takim, duke e siguruar Senatorin McCain se vendi ynë dhe Forcat e Armatosura shqiptare do të vazhdojnë ta luajnë këtë rol edhe në të ardhmen.
Nishani dhe McCain diskutuan edhe për situatën e Ballkanit, ku u vlerësua roli dhe kontributi i Shqipërisë dhe kombit shqiptar për konsolidimin e marrëdhënieve me fqinjët.
Vizita e zyrtarit amerikan në Tiranë vjen në një kohë krize politike për shkak të protestës dhe bojkotit të opozitës, si edhe krizës PS-LSI. McCain vjen në Tiranë në kuadër të një turi në Ballkan. Më vonë ai do të takojë ministrin e Jashtëm Ditmir Bushati dhe kryeministrin Rama. (D.D/Shuplaka)
