“Tirana Art Fest” do të rikthehet për të dytin vit radhazi në gjimnazet e Tiranës, ku të rinj të moshave 15-19 vjeç, do të performojnë në tre disiplina të ndryshme, muzikë, kërcim dhe multimedia.
Audicionet e para mësohet se kanë nisur në tre gjimnazet “Ismail Qemali”, “Partizani” dhe “Sami Frashëri”, ku i pranishëm ishte edhe Kryetari i Bashkisë së Tiranës, Erion Veliaj.
Në fjalën e tij në gjimnazin “Sami Frashëri”, Veliaj theksoi se ky konkurs nuk është thjesht një garë, por një mundësi për të gjithë: “Është shumë e rëndësishme të kuptojmë që secili prej nesh ka një talent, ka një dhunti, e disa mund ta kenë talentin në shkencë, në çështjet e arsimit dhe në mësimdhënie. Dikush mund ta ketë në olimpiada, dikush mund të jetë i shkëlqyer në sport, por kjo është një hapësirë tjetër për të provuar veten dhe për të parë se sa vlen edhe në një fushë tjetër. Unë realisht besoj që një njeri që mban 10 përgjegjësi mund të bëjë dhe gjënë e 11-të, një njeri që s’bën dot asnjë gjë, s’bën dot dy gjëra sigurisht.”
Në takimin me nxënësit e shkollës “Partizani”, ai bëri me dije se aktivitetet e “Tirana Art Fest” do të organizohen tek ambientet e Piramidës, e cila është rihapur për publikun për organizimin e aktiviteteve të ndryshme. “Unë do të doja që nga tani e tutje të fillojmë të marrim mbrapsht hapësirat që janë okupuar, ose janë degraduar ndër vite”, tha ai. (XH.A/SHUPLAKA)
