Nisin përplasjet e para te ‘Zgjedhorja’, Gjiknuri nuk pranon propozimin e PD: Mos sillni hallet e partive

Ka përfunduar takimi mes përfaqësuesve politikë të Reformës Zgjedhore, në fundin e të cilës Damian Gjiknuri u shpreh se PS nuk është dakord për propozimin e opozitës, për të përjashtuar për 4 vite nga Vetingu, gjyqtarët që merren me ankimimet zgjedhore.

Gjiknuri tha që në tryezën e Reformës Zgjedhore nuk mund të sillen çështje të interesave politike.

Sipas Gjiknurit propozimi i PD-së për të shtyrë me katër vite Vetingun për gjyqtarët e çështjeve zgjedhore minon procesin e Reformës në Drejtësi, dhe vë në diskutim parimet e kushtetueshmërisë.

Nga ana tjetër përfaqësuesi i PS-së në tryezë theksoi edhe njëherë tjetër qendrimin se Reforma nuk synon mbajtjen e zgjedhjeve të parakohshme, pasi kjo nuk mund të jetë një fitore që merret në tavolinë.

“Sot patëm takimin e radhës, ku diskutuam mbi disa nga propozimet e PD, me keqardhje konstatuam disa propozime që kanë nevojë për rishikim, pasi vendosin në dyshim gjithë Reformën në Drejtësi dhe rendin kushtetues. 

Nuk mund të sjellim hallet politike që kemi, në tryezën e Reformës Zgjedhore, ne jemi të hapur gjithsesi për të diskutuar. Jemi duke negociuar për disa çështje, por rendi diskutues nuk mund të vihet në pikëpyetje, për shkak të disa interesave partiake. 

Unë besoj që PD është aty për të miratuar Kodin Zgjedhor me ne dhe me parlamentin, nëse kanë vendosur që ti rikthehen insitucioneve nuk ka se pse që të ndikohen nga qendrimet e presidentit. Nuk ka diskutim për qeveri tranzitore, ato që nuk u arritën me luftën në rrugë, nuk mund të merren në tavolinë.”, u shpreh Gjiknuri.

Gjiknuri tregoi edhe pikat që shumica ka pranuar nga propozimet e PD-së. “Propozimet në lidhje me sinjalizuesit dhe mbrojtjes që duhet të kenë, edhe këtë do ta gjejmë kompromisin, por gjërat principale për rendin kushtetueses nuk mund ti vendosim në pikëpyetje. Për psh, për sinjalizuesit po e gjejmë kompromisin, për rolin e policisë, po ashtu edhe disa propozime si ruajtja e rendit rreth qendrës edhe ato do i pranojmë. Ka disa propozime që janë garantues teknik dhe jemi gati ti pranojmë”.

Çfarë propozonte opozita: 

Ankimimet në zgjedhje, opozita propozon moratorium 4 vjeçar nga vetingu për gjyqtarët e zgjedhjeve: T’iu heqim presionin!

(E.K/Faxweb.al)