Një ditë përpara protestës së opozitës, që do të nisë ditën e nesërme në mesditë, janë marrë një sërë masash paraprake. Mësohet se policia ka mbuluar tendën përpara Kryeministrisë pas urdhrit të marrë, si një mënyrë mbrojtjeje nga inati i protestuesve.
Bëhet fjalë për strehën e gjerë, mbushur me drita, që përbën fasadën e Kryeministrisë pas ndryshimeve që ka pësuar godina. Ky objekt që karakterizon tashmë godinën e ngritur në këmbë në 1930-ën, është mbuluar me rrjetë si masë paraprake për ta mbrojtur nga sulmet me sende të ndryshme të protestuesve, sikundër paralajmëroi Policia e Tiranës në njoftimin e saj.
Protesta e 18 shkurtit është protesta e parë që opozita zhvillon për këtë vit, pas protestës së zhvilluar më 8 dhjetor. (XH.A/SHUPLAKA)
