Një ditë përpara protestës së paralajmëruar nga opozita, kryetarja e LSI-së, Monika Kryemadhi tha se nuk ka të bëjë vetëm me protestën politike por për protestën ekonomike të qytetarëve.
Ajo bëri të ditur se në mbledhjen e sotme të grupit, do të diskutohet “që të bëhemi gati për të shkuar drejt zgjedhjeve të parakohshme, sepse ne jemi të bindur që do të shkojmë drejt këtyre zgjedhjeve, dhe po mobilizojmë shtabet elektorale për ti bindur se po shkojmë drejt zgjedhjeve të parakohshme”.
Kryemadhi deklaroi se shteti shqiptar sot është i kapur, dhe kapja e tij sipas saj, ka pasuruar pesë veta dhe ka varfëruar më shumë shqiptarët.
Pak përpara fillimit të mbledhjes së ish-grupit parlamentar të LSI-së, Kryetarja e kësaj force politike Monika Kryemadhi foli për protestën e ditës së nesërme, për të cilën tha se do të jetë protestë kundra varfërisë.
Kryemadhi tha se tashmë ka ardhur koha që politikanët shqiptarë të japin llogari para popullit për premtimet e pambajtura.
“Prandaj protesta e nesërme është një protestë në vazhdimësi të protestave jo të opozitës por të shqiptarëve. Dhe protestat që do të vijnë çdo ditë dhe më shumë do të jenë protestat kundër varfërisë dhe koalicioni opozitar do të jetë koalicion që do të rimëkëmbë ekonominë shqiptare dhe do të jetë ai koalicion që do t’i japë shansin dhe mundësinë shqiptarëve për të pasur më shumë punë, për të mbajtur fjalën politikanët. Sepse janë mësuar në kaq vite që politikanët nuk e mbajnë fjalën. Por ka ardhur koha që politikanët të japin llogari përpara popullit dhe ta kenë frikë atë. Jo të ketë populli frikë politikanët”, tha Kryemadhi.
E pyetur nga gazetarët në lidhje me rolin e deputetëvë të rinj në Parlament, Kryemadhi ironizoi ata duke thënë se “Nëse këta deputetë do të kthenin 400 mijë shqiptarët që kanë ikur nga kushtet e vështira dhe mungesën e kafshatës së bukës, nëse këta deputetë kanë hyrë në mënyrë kontrabandë në Parlament do të krijojnë mundësinë që të rrisin rrogat, të ulin çmimin e energjisë elektrike, të ulin taksat e shqiptarëve, kjo do të ishte një gjë shumë e mirë”, tha Kryetarja e LSI-së Kryemadhi.
Kryemadhi foli përpara gazetarëve edhe për përzgjedhjen e kandidatëve në radhët e partisë që drejton për zgjedhjet e lokale dhe të përgjithshme. “Ne nuk do të lejojmë kandidatë me të kaluar kriminale, me një mandat që ju shërben oligarkëve por me një mandat që ju shërben qytetarëve”.
Ajo bëri edhe krahasimin e situatës politike midis Shqipërisë dhe Serbisë për shkak të protestave të vazhdueshme në të dy vendet përkatë. “Vuçiç u tregua më i zgjuar se Edi Rama dhe më i shpejtë se ai, pasi i pranoi dhe i shpalli zgjedhjet e parakohshme, ftoj Edi Ramën që të bëjë të njëjtën gjë”.
(F.GJ/FAXWEB.AL)
