Ka shkuar në 19 numri i zyrtarëve të arrestuar në lidhje me kalimin e dy kamionëve me kanabis nga Porti i Durrësit në drejtim të Italisë.
Dje në mesditë është arrestuar edhe shtetasi Elis Deliu, doganier në Tiranë, duke e çuar në nëntë numrin e doganierëve të arrestuar me urdhër të Prokurorisë së Krimeve të Rënda, e cila ka firmosur prangosjen edhe për dhjetë efektivë policie, raporton Panorama.
Mes të arrestuarve është edhe shefi i stacionit të policisë, Julian Doraci. Prokuroria sqaron se doganieri i arrestuar dje, Elis Deliu, ka lidhje me praktikën doganore të kamionit me 2.2 tonë lëndë narkotike të kapur më datë 21 mars 2017, në Mantova të Italisë.
Në këtë datë është ndaluar nga polica italiane kamioni që në këtë kohë drejtohej nga Ervis Hysa dhe bashkë me të ndodheshin shtetasi shqiptar Izmet Kullolli dhe një shtetas nga Maroku.
Nga kontrolli i automjetit është parë se në të gjendej e fshehur sasia prej 2.2 tonësh kanabis. Personat që ndodheshin në automjet janë arrestuar nga polica italiane për veprën penale të trafikimit të lëndëve narkotike. Sipas hetimeve, lënda narkotike është trafikuar nëpërmjet Portit të Durrësit për në shtetin italian.
Prokuroria sqaron se kamioni me 2.2 tonë kanabis nuk është kontrolluar siç duhet as në Doganën e Tiranës dhe as në Durrës. Gjithashtu në Portin e Durrësit janë konstatuar mangësi e parregullsi në kontrollin fizik që i është bërë automjetit ku ndodhej lënda narkotike, edhe prej efektivave të Policisë së Postës Kufitare të Portit.
Sipas Prokurorisë, të gjithë këta personat që shin në turn janë vendosur në pranga pas hetimeve që nisën krimet e rënda, pas kapjes së kamionit me drogë në Itali. Prokuroria i akuzon 19 të arrestuarit edhe për rastin e kamionit me 8 tonë kanabis që hyri në Shqipëri në shkurt 2017 nga Maqedonia dhe që kaloi në Portin e Durrësit pa u kontrolluar, e më pas u kap në Itali ku ra në pranga shoferi. (M.D/ Shuplaka)
Discussion about this post