Lëvizja Vetëvendosja në Tiranë ka reaguar me tone të ashpra sa i takon vizitës së presidentit të Serbisë, Aleksandar Vuçiç në vendin tonë për të marrë pjesë në takimin e minishengenit. Në një deklaratë për mediat, kryetari i Lëvizjes Vetëvendosja në Tiranë, Enis Sulstarova e quajti Vuçiçin një kriminel lufte, që sipas tij vjen të pozojë si bamirës.
“Vuçiç, një kriminel lufte vjen të pozojë si bamirës. Qeveria në Shqipëri po përpiqet që një kriminel lufte si Aleksandar Vuçiç ta paraqesë si bamirës të të prekurve nga tërmeti i nëntorit, duke tentuar t’ia shplajë figurën Vuçiçit. Mirëpo, shqiptarët e dinë se presidenti i Serbisë ka qenë Ministër i Informacionit gjatë kohës kur regjimi i Milosheviçit ka kryer masakra të shumta në Kosovë.
Ushtria dhe paramilitarët serbë kanë vrarë e masakruar me mijëra civilë, nuk kanë kthyer mbi 1600 persona që mbeten të pagjetur, kanë dhunuar 20 mijë gra e vajza, kanë shkatërruar mbi 100 mijë shtëpi, kanë vjedhur artefaktet kulturore e fondin pensional, kanë shkatërruar mbi 50% të traktorëve dhe të bagëtisë në Kosovë, dukë bërë që Serbia t’i ketë borxh kombit shqiptar mbi 20 miliardë euro si dëmshpërblime lufte. Qeveria Vuçiç vazhdon ta luftojë pavarësinë e Kosovës dhe punon pa u ndalur kundër interesave të kombit shqiptar”, tha Sulstarova.
Ai kërkoi që edhe Shqipëria ta refuzojë minishengenin, njësoj si Kosova. “Sot që Kosova njëzëri refuzon të marrë pjesë në një takim ku ministri i Milosheviçit paraqitet si bamirës, interesi kombëtar na thotë se të njëjtin qëndim duhet të mbante edhe qeveria e Shqipërisë”, deklaroi Enis Sulstarova.
Discussion about this post