Një natë para seancës konstituive, mbahet një takim mes liderëve të partive të PAN’it, Ramush Haradinaj e Kadri Veseli, me kreun e AKR’së, Behgjet Pacolli. Në këtë takim mund të vendoset fati i seancës së nesërme, por edhe formimi i tërësishëm i Qeverisë.
Partneri parazgjedhor i Pacollit, Isa Mustafa, pak orë më parë bëri të ditur se është takuar me kreun e AKR’së, me të cilin kanë betonuar aleancën mes tyre.
Por, burimet e Gazetës Express, tregojnë se Pacolli takim po zhvillon edhe me kampin tjetër, me të cilin herë shfaqën afërsi e herë thanë se nuk do të bëhen bashkë.
Gjatë ditës disa prej anëtarëve të kryesisë së AKR’së thanë se kjo parti nuk do të perkah kandidatin e PAN’it për kryetar të Kuvendit.
Megjithatë bazuar në takimin që po zhvillohet, bëhet e ditur se kreu i AKR’së nuk është i distancuar nga PAN. Përkundrazi, nëse arrihet një marrëveshje, ata edhe mund të vazhdojnë se bashku rrugëtimin e tyre politik.
Në takimin e kësaj mbrëmje thuhet se temë e diskutimit është kalimi i Demarkacionit, Asociacionit, për të cilat Pacolli ka disa kushte.
Ndryshe, kreu i AKR’së në Kuvendin e fundit që ka mbajtur kjo parti, ka marrë dritën e gjelbër që të marrë vendime, të cilat do ta zhbllokonin gjendjen politike. Qeveria gjithëpërfshirëse ishte kërkesa që Pacolli u bëri liderëve partiakë që pas përfundimit të zgjedhjeve.
Nesër pritet të mbahet seanca konstituive e koalicioni PAN kanë konfirmuar pjesëmarrjen e tyre pas disa mungesave për shkak të të cilave akoma nuk është zgjedhur kreu i Kuvendit
Kujtojmë që bllokada në Kosovë vazhdon për më shumë se dy muaj pasi asnjë nga koalicionet nuk I ka numrat për të formuar qeverinë. Gjithashtu seancat konstituive në kuvendin e Kosovës të thirrura nga deputeti më I vjetër në parlamen Adem Mikullovci për zgjedhjen e kreut të Kuvndit kanë dështuar me radhë njëra pas tjetrës. (B.H/Shuplaka)
